Rojawan de amadekarîya seba Roşanê Remezanî dewam kena. Hetêkî ra şar kincan hêrîneno û hetêkî ra zî şirîya xo virazeno. Eşkerayo ke rîyê vîrusê Korona û krîzê ekonomîkî ra no roşan do tay cîya bivîyaro.

Delale Hemûd derheqê roşanî de qisey kerd û vat: ''Ma seba bazarîya roşanî ameyî suq. La vayî zêde yê. Ma nêeşkenê her çi bihêrîne. Xêr ser o na rewşa do biba hol.''

Enîse Mihemed zî vat: ''Vayanê zêdêran ra xeylêk kesan çîyêk nêhêrîna.''

Hemwelatîya Semere Xelef zî sere de roşanê dadîyanê şehîdan, roşanê her kesî fîraz kerd û vat: ''Ez wazena ke pê na wesîleya roşanî Efrîn, Serêkanîyê û Girê Sipî bibê azad.''

Cinîyanê efrînijan ê ke Şehba de ciwîyayêne zî îfade kerd ke ê wazenê Roşanê Qurbanan Efrîn de pêşwazî bikerê.

Henîfe Beko vat: ''Sey koçberan no roşanê ma yo hîrêyîn o. Ma wazenê roşanê bînî Efrîn de fîraz bikerê. '' 

Şêrîn Reşîd zî vat: ''3 serran ra nata ma mîyanê şert û mercanê zehmetan de ciwîyenê. Waştişê ma yo ke ma abigêrê Efrîn.''