Endama Koordînasyonê KJKyî Hêvî Nûda cewab da persanê ANFyî. Beşê payênî yê roportajî wîna yo:

“Ganî ma sere de nê zaf hol bizanê ke no rejîmê AKP-MHPyî îqtîdaro normal nîyo. No îqtîdar polîtîkaya şerê taybetî şuxulneno. Dişmenê kurd, cinî, merdimîye û ehleqî yo. Ganî ma çirey xo vîr ra mekerê ke qet yew dewr de rewşe hende girane nêbîye. Çirey zûr, qirkerdiş, dizdîye û tecawuz hende zaf nêbî. Ganî ma zî vera nê tewir û metodê têkoşînê xo raşt bivijnê ke ma ser bikewê.

Senî ke qirkerdişê Dêrik û Dîlokî yê ke sey qezayê trafîkî ameyî kerdene, normal nîyê, qirkerdişê cinîyan û meseleyê tecawuz û şîdetî yê vera cinîyan ê Kurdîstan û Tirkîya zî normal nîyê. Nê vakayê edlî nîyê. Bi temamî bi destê dewlete yenê caardene. Eke qirkerdişê cinîyan û tecawuz çînêbo AKP zî çîn o. No rejîmê şerê taybetî estbîyayîşê xo dişmenîya vera kurdan û cinîyan ser o domneno. Coka her roje cinîyî yenê qetilkerdene û raştê tecawuzî yenê. Wextê AKPyî de nê hedîseyî bîyî normal û bi nê tewirî komel ameyo kungkerdene û ercê ci yeno wardayene.

Şirnex de Firdevse Bebat ameye qetilkerdene, raştê tecewuz û îşkenceyî ameye. No netîceya polîtîkayanê şerê taybetî yê vera cinîyan ê AKPyî yo. Xora kiştox mîyanê sîstemê qoricîtîye de yo û birayê ci zî tecawuzê domanan kerdo. Nê kiştoxê hesabê xo yê medyaya sanale de zî kolîyê ke daristanê Besta de ameyî birnayene semedê înan vato ‘kolîyê rotişî est ê.’ No zî reyna mojeno ke rejîmê AKPyî rejîmê tecawuz û şerê taybetî yo. Nê qoricîyî hetê dewlete ra yenê weyekerdene pere, çeke û cesaretê hêrişê vera cinîyan îqtîdarî ra genê.

Reyna naye ra dima Hezex de camêrdêko keyeyê ci pabesteyê hîzbîkontrayî yo cinî û hîrê kênayê xo kiştî. Wird hêrişî zî şirnex de bîyî. Tebeê nînan de zaf meseleyî est ê. Dêrsim de Gulîstane Doku, Êlih de Îpeke Er û xeylêk qirkerdişanê winayênan de wezîfedarê dewlete sey sûcdar vejîyayî vernî. La nê wird meseleyanê peyênan de xayînê mîyanê kurdan ameyî şuxulnayene. Nê polîtîkayî semedê cinîyan û komelî zaf tehlukeyin ê. Bitaybetî têgêrayîşê cinîyan ê kurdîstanî ganî zaf hîsgêr têbigêrê û têkoşînê cinîyan xurtêr bikerê.

Hêrişê vera cinîyan têna hetê yew di camêrdan ra nêbenî. Nê hêrişî pê destê dewletê yenê kerdene. Ganî têgêrayîşê cinîyan na polîtîka bivînê û goreyê ci têbigêrê. Ganî sîstemê qoricîtîye, dişmenîya vera cinî û xoza bêrê teşhîrkerdene. Desto ke gule erzeno gerîlayan, daristanî birneno û cinîyan kişeno eynî dest o.  Şerê taybetî û linga ci ya Kurdîstanî sîstemê qoricîtîye yo. Ganî cinî destûr medê ke no dest bêro şuxulnayene. Qirkerdişê cinîyan îdeolojîk û sîyasîyî yê. Camêrdê ke dewlete weye kena bi destê înan cinîyî yenê qetilkerdene. Ganî cinîyî xo bipawê. No zî bi têkoşînê xopawitişî yê rêxistinkerdeyî beno. Ganî hesabê nê qirkerdişan bêro persayene. Ganî qesasê heme cinîyan ê ke raştê tecawuzî ameyî û ameyî qetilkerdene bêro persayene.

No rejîmo wehşî bi gonîya cinîyan payra yo, pê qirkerdişê cinîyan hêzdar beno. Ganî cinîyî vera qikerdişê cinîyan wirzê payan ser û hesabê her cinî bipersê. Sey Kurdîstanî Tirkîya de zî cinîyî mexdûrê şerê taybetî yê. Goreyê yew cigêrayîşî mabênê serranê 2011-2021 de 3 hezar û 300 cinîyî ameyî qetilkerdene. Vera cinîyan yew şer yeno kerdene ke nêameyo îlankerdene. Cinîyî ganî hêzê xo bikerê yew û verê nê qirkerdişan bigêrê.

Rejîmê şerê taybetî tew zaf hêrişê cinî û xoza keno. Îqtîdar sey parelelî pîya bi qirkerdişê cinîyan qirkerdişê ekolojik û kulturkî keno. Hêrişê vera xozaya Kurdsîtanî hinda sey çîyêkî normalî yeno vînayene. Sey cinîyan coğrafyaya Kurdîstanî zî bi metodanê cîya cîyayan raştê îşkenceyî yena û yena qirkerdene. Kenê ke cografaya ma ya cenetî biaçarnê cehenemî. Gerîlayî semedê pawitişê erdê xo ganê xo danê. Ganî şarê ma zî semede pawitişî erdê xo têkoşînî xurt bikero. Mesela Besta de bi tonana darî ameyî birnayene. Ganî şerê ma destûrê nê medo. Êyê ke ewro daran birnenê siba beno ke banê to zî birijnê.

Dişmen seba ke îradeyê azadîye bişikino her medotî ceribneno. Polîtîkaya zîndanî ya dewlete Îmraliyî ser o bewlî bena. Pê polîtîkaya hêrişkare kenê ke merdiman ercanê cira raqilnê. Nizdîbîyayîşê înan oyo ke  ya bibê sey mi ya zî bimirê. Tepişteyê nêweş û extîyarî raştê zulmê pîlî yenê.  Şehadetê zîndanî semedê ma benê sebebê pîlkerdişê têkoşînî. Hemrayê ma zîndanan de çok nêdanê û bi xoverdayîşî wezîfeyê xo anê ca. Merdimê tepişteyan çend cayan de nobeta edelatî tepişenê. Her keyeyê tepişteyan mewzîyêka şorişgêr a. Ganî merdimê tepişteyan gamanê dahîna girdan bierzê û şarê ma wayîrê têkoşînê zîndanan bivejîyo û nê keyeyan têna meverdo. Wa hetê şorişgêr û demokratî semedê zîndanan hîsgêr bê. Hêrişê poşmanîye bi têkoşînê hemparî eşkenê bêrê betalkerdene. Ganî babete tim rojdem de bêro tepiştene û bi çalakîyanê fermîyan ê cîya cîyayan dişmenî rê peyser game bêro eştene.’’