Endama Koordînasyonê KJKyî Hêvî Nûda beşê diyînî yê roportajê xo de ANFyî rê sûcê şerî yê dewleta tirke ya îşxalkere û binkewtişê artêşa îşxalkere ercnayî.

Qiseykerdişê Hêvî Nûda ra tay beşê girîngî wina yê:

''Şuxilnayîşê çekanê kîmyewîyan babetêka cidî ya û têna kurdan yan zî gerîlayan eleqedar nêkena. Eke verê hêrişanê kîmyewîyan nêro girewtene vera şaranê herême û merdimîye netîceyê ci do giran bibê. Qaşo çekê kîmyewîyî qanûnanê mîyanneteweyîyan de qedexe yê. A raşte hêzê hegemonîkî dûştê çekanê kîmyewîyan nîyê. Înan rê têna no muhîm o ke nê çekî destê kamî de yê.

Dewleta tirke Herêmanê Pawitişî yê Medya de çekanê kîmyewîyan şuxilnena û bi nê hawayî sûcê şerî kena. Hetê bînî ra şuxilnayîşê nê çekan binkewtişê artêşa tirke ya îşxalkere zî eşkera keno. Faşîzmê dewlete wazeno pê çekanê kîmyewîyan û bombaya nuklere ya taktîkî qirkerdişê kurdan temam bikera. Hêzê mîyanneteweyî zî pê peygoşîya xo paştî danê dewleta tirke.

Gerîlayî bi îradeyêkê pîlî xo ver danê, pê hişmendîyêka pîle ya azadî û merdimîye şer kenê. La oyo ke dewleta tirke kena şer nîyo. Têkoşînê gerîlayan venga her kesî dano ke têkoşînî û erjanê merdimîye berz bikero. Wa merdimê wayîrwijdanî vengê xo vejê, tewrê têkoşînî binê û vera çekanê kîmyewîyan û bombaya nuklere çalakîyan bikerê. Eke verê hêrişanê kîmyewîyan ê dewleta tirke nêro girewtene dore do bêra şaranê bînan. Dewleta tirke do siba nê çekan şaristanan de zî bişuxilna. Wa her kes her ca de vera nê çekan nêrazîbîyayîşê xo bimojno. Wa demokras, welatperwer, dost û şorişgêrî sere de OPCW pêro dezgehan rê teda bikerê ke vera çekanê kîmyewîyan têbigêrê.

Wa her kes bizano ke şuxilnayîşê çekanê kîmyewîyan normal nîyê. Eke nê çekî û bombaya nuklere bêrê normalîzkerdene vera ameyoxê domananê ma, xozaya ma û komelê ma tehlukeyê pîlî do vejîyê meydan û netîceyê ney do giran bibê. Bi taybetî wa cinîyî vera ney têkoşînî berz bikerê. Ewro gerîlayî rixmê nê çekan zî bi ruhê Apogîrî ser kewenê. Dewleta tirke seba ke binkewtişê xo mîyan bikera wina hêrişê gerîlayan kena. Ganî no serkewtişê gerîlayan û xoverdayîşê şarî serra 38. ya serewedaritişî de bibê yew û verê serkewtişanê bînan abikerê.''