Têgêrayîşê Cînîyan Kurd (TJK-F) Platformê Jin Jiyan Azadî, Koordînasyonê Cinîyan ê Neteweyî yê Fransa, Yewîya Sendîkayanê Solîdaires û Aletra Femînîsta seba vîrardena şehîdanê 23ê kanûne û 9ê çeleyî bi mêmandarî Şaredarîya Parîsî bi şîarê ‘‘Cinî Cuye Azadî, Ma Do Heyfê Xo Bi Şorişê Cinîyan Bigîrê!’’ ameyê têhet.

Destpêkê çalakîye bi qiseykerdişê Alexandra Cordebard dest pêkerd. Cordebarde vat, ‘‘Seba ke ez awanîya şaredarî seba cinîyanê kurdan pêşkeş kena ez zaf keyfweş a. Werekna ma seba keyfweşî û şayîye ameyêne têhet. La çi heyf ke herêma ke ez tede xebitêne, tîya de zaf cinîyî ameyê qetilkerdene. Sakîne Cansiz, Fîdane Dogan û Leyla Şaylemez. 10 serrî yo ke ma hewl dayêne ke roşn bikerê ke kam peynîya nê qetilkerdişan de yo. Û dima reyna herêma mi de qetlîamêk virazîya û Evîne Goyî zî tede bîyî. No nêyeno qebulkerdene û no hal hêrsê ma hîna zaf keno.’’

Qiseykerdişê akerdişî ra dima deqayêk rêze ameye girewtene.

 ‘Îran de çîyêk xo bi xo nêqewmîya’

Platformê Jin Jiyan Azadî ra Fatme Kerîmî, derheqê îran û Rojhelatî de qisey kerd û behsê Jîna Emînî kerd û vat, ‘‘Çîyo ke nika Rojhelatî ra qewmêno, hêzê ma, enerjîyê ma û tecrûbeyê ma yê ke ma parçeyê bînî yê Kurdîstanî de qezenç kerdî. Îran de çîyêk xo bi xo nêqewmîya.’’

Muhîmîya yewîya têkoşînan

Sendîkaya Solidaires ra Julie Ferrua vat, ‘‘Şehîdê Parîsî seba nê têkoşînî ganê xo da. Ma çend têkoşînê xo bikerê yew û ma çend pîya heqîqetî bigêrê, ma hende eşkenê hemverê nê qatlîaman de bivinderê.’’

Cinîyanê têkoşeran ra tersenê

Koordînasyonê Cinîyan ê Neteweyî yê Fransa ra Nadîa Chaabane heqê qiseykerdişî girewt. Û nameyê cinîyanê tûnisijan ser o zî qisey kerd û vat, ‘‘Cinîyanê têkoşeran ra tersenê. Seba ke cinîyî ke têkoşîn kenê, komelî bedilnenê. Seba ney zî Tirkîya, Kurdîstan, Îran, Tûnis, Fransa û xeylê herêmê dinya de benê hedef. Gere têkoşînê cinîyan hîna gird bibo. Mexdûrê sîstemî vernîya her çîyî cinî yê.’’

Hemverê qirkerdişê cinîyan de têkoşînêko hempar

Nameyê cinîyanê tamîlîjan ser o Sanhaja Akrouf dîyar kerd ke, ê welatê xo de hem hetê sîstemî ra hem zî keyeyê xo de hetê keyeyê xo ra rastê şîdetî yenê. Akroufe ard ziwan ke, seba ke wina platformêkî de cinîyan reyde ameya têhet zaf keyfweş a. Nameyê UCLyî ser o Lîla Alahayaa û nameyê Alerta Femînîsta ya Amerîkaya Latîne ser o zî Francîsca Toledo dîyar kerd hêrîşê vera cinîyanê kurdan nêyenê qebulkerdene.

Xeylê sazgeh û platformê bînî beşdarê çalakîye bîyî û bale ante vera qirkerdişê cinîyan têkoşînêkê hemparî ser o û dîyar kerd ke têkoşînê cinîyan do heta peynîye dewam bikero.

Çalakî saete 9.00ê şanî de bi slogananê ‘Jin Jiyan Azadî’ qedîya