Şirnex de cinîyî binê sebanê Rêxistina Cinîyan ya Paştîdayîşê Morî de yenî têhet.

Rêxistina Paştîdayîşê Morî par Mêrsîn de ronîyayîşê xo îlan kerdbî. Cîya-cîya nasnemeyan ra cinîyî bi paştîdayîşê yewbînan têkoşîn danê. Antakya, Mêrsîn, Antalya, Edene, Îzmîr û Stenbolî dima nika zî Şirnex de ciniyan bi nameyê Paştîdayîşê Morî yê Botanî ronîyayîşê xo îlan kerd.

Wendekara beşê Rojnamegerîye Zîşan Basana ke serrêk o ke xebatanê Paştîdayîşê Morî de bi hawayo aktîf ca gêna, dîyar kerde ke rexistina înan fabrîkayan ra heta hêgayan, her ca de xo resnena cînîyan û wina va: "Ma cinîyê Botanî ke cîya-cîya bajaran de wanenî û xebitîyenî waştî ke bajarê xo de zî rêxistina Paştîdayîşê Morî abikerî û ma waştişê xo ard ca."

Basane muhîmîya xoverdayîşê cinîyan viste vîr û wina dewam kerde: "Sîstemê serdestî yê camêrdî pêroyîya dinya de vera cînîyan de şer keno. No sîstem her ca de cinîyan rê zextan keno û wazeno ke cinîyan bigîro kontrolê xo. Ganî ma cinîyî vera naye de xo bi hawayo rêxistinî têbigerî. No semed ra rexistinê winasî zaf mûhîm î. Ma sey cinîyê Botanî binê serbanê Paştîdayîşê Morî de yenê têhet û têkoşîn danî.