Lajê Salîha Acar Mîzbeh Acar wextê qedexeyê tebervejîyayîşî yê 14ê kanûna 2015î-2ê adara 2016î de seba ke hetê madîyî ra paştî bido keyeyê xo ver bi Antalya kewt rayîr. Mîzbeh Acar rayîr de ame destbendkerdene û bi îdîaya 'endamîya rêxistine' tepişîya. Acar erşawîya Zîndanê Antalya.

Seba ke babî Acar nêweş o dadî Salîha Acar debarê keyeyî kena.Dadî taxa Cûdîyî ya Cizîre de tandiran virazena û roşena.  Salîha bi nê hawayî hem debarê keyeyê xo kena hem zî hewcedarîyanê lajê xo peyda kena.

Dadî Salîha Acar vana: ''Her roje saete 9 de ez dest pê karî kena û binê na tîje de heta şanî xebitîyena. Rojêke de yew tandir virazena. Her tandir 200 TL yo. Ez pê nê pereyan hem keyeyê xo rê çîyêk gêna hem zî lajê xo yê tepişteyî rê pere erşawena. Ez zî nêweş a. Emser çew tandir zaf nêgêno. Ez zaf kede dana, zaf qefilîyena.''

Salîha ard ziwan ke bi desan ciwanê kurdî zîndanan de yê û vat: ''Lajê mi wendekarê lîseyî bi. Ez têna wazena ke nê welatî de aramî û haştîye bibê, wa berê zîndanan abibê. Hînî ma zî wazenê bi hawayêkê aramî biciwîyê.''