Cinîyî rayberîya Meclîsanê Cinîyan de qezaya Beşîktaşî ya Îstanbulî de ameyî pêser û qetilkerdişê Pinare Gultekîn protesto kerd. Cinîyan ard ziwan ke ê do nêverdê ke Peymana Îstanbulî bêra wedaritene.

Cinîyan îqtîdar hîşyar kerd ke Peymana Îstanbulî bîyaro ca. Çalakîye de fotografê Pinare Gultekîn ameyî kiriştene û pankartî ameyî akerdene. Çalakîye de Sekretera Pêroyî ya Platformê 'Ma do verê kişîyayîşê cinîyan bigêrê' Fîdane Ataselîm qisey kerd û vat:'Ma hêrsbîyaye yê û ma do gamêke zî apey nêerzê. Hînî bes o, ma nêwazenê cinîyî bimirê. Îqtîdar Peymana Îstanbulî ca nêano. Çimê ci hê heqanê cinîyan de yo. Her roje cinîyî yenê qetilkerdene. Eke şima wazenê naye vindarnê Peymana Îstanbulî bîyarê ca. ''

Embaza Pinare Gamze Sert zî çalakîye de pare kerd ke cuya Pinare de tim têkoşîn estbî û vat: ''No têkoşîn hetê kesêkî ra destê aye ra ame girewtene. Manêwazenê bimirê, ma hînî wazenê ke biciwîyê''

Hunermende Şevvale Sam zî vat: ''Ez her çî ra ver cinîyêk a. Cinîyî mejbûr ê ke heqanê xo bigêrê.''

Çalakîye pê sloganê 'Ti do qet têna nêşore' qedîyaye.

Hetê bînî ra şaristananê sey Îzmîr, Anqara, Adana, Hatay, Mersîn û Antalya de zî qetilkerdişê Pinare pê çalakîyan ame protestokerdene.