Meclîsê Pêroyî yê Îdareyê Xoserî yê Rojawanê Kurdîstanî 12ê kanûne de Peymana Komelkî îmza kerdbî. Meclîsê Cinîyan ê Îdareyê Xoserî zî 7ê temmuze de bi beşdarîya qasê se cinîyan startê Peymana Komelkî ya Cinîyan da. Endama Meclîsê Cinîyan û Endama Komîteya Peymana Komelkî ya Cinîyan Dr. Ebîre Hessaf derheqê babete de ANFyî rê qisey kerd.

Ebîre Hessaf îfade kerd ke madeyanê Peymana Komelkî de amebî dîyarkerdene Peymana Komelkî ya Cinîyan zî wa bêra viraştene. Ebîre vat: ''Ma sey Meclîsê Cinîyan Peymana Komelkî de cagirewt. 7ê temmuze de zî ma seba viraştişê Peymana Cinîyan ameyî têhet. Kombîyayîşê ma çar saetan dewam kerd. Rojdemê ma de prensîbê cinîyan ê kongreya Meclîsê Cinîyan a 2021î est bîyî. Ma kombîyayîş de  seba nuştişê Peymana Cinîyan komîteya tenge ya bi 25 kesan awan kerde. Komîte dest pê karanê xo kerd. Komîte do senînîya rêxistinîya cinîyan dîyar bikera.

Meclîsê Cinîyan heta nika seke sîwana pêro cinîyan, dezgeh û têgêrayîşanê cinîyan bîyo. Bi na peymane xebatê ma yê Meclîsê Cinîyan do hîra bibê û bêrê raştkerdene. Bi nê hawayî ma do asta rêxistinîye zî newe ra dîyar bikerê.''

Ebîre Hessaf ard ziwan ke destkewteyê cinîyan ê Rojawanê Kurdîstanî zaf girîng ê û vat: ''Xora bi Peymana Komelkî ya Pêroyîye destkewte, heq û rêxistinîyê cinîyan ameybî binê garantî ke no bi xo serkewtişêko pîl o. Peymana Komelkî ya Cinîyan Rojhelatê Mîyanênî de reya verêne nusîyaya û pare kerd ke na peymane seba dinya mîrasêk o coka zaf girîng a. Ancî girîng o nê destkewteyî bipawîyê û bizêdîyê. Peymana Komelkî ya Cinîyan do seba ney bixebita.''