Platformê Cinîyan ê Dêrsimî Meydanê Seyîd Rizayî de derheqê hedefbîyayîşê Peymana Îstanbulî de eşkerayîyêke daye. Xeylêk cinîyî tewrê eşkerayîye bîyî. Cinîyan pankarta bi nuşteyê 'Peymana Îstanbulî dana ciwîyayene, ma heqanê xo ra fek vera nêdanê' akerde û fotografê cinîyanê ke ameyî qetilkerdene, kiriştî.

Hemsereka HDPyî ya Dêrsimî Nurşate Yeşîl qisey kerd û vat ke her roje cinîyî yenê qetilkerdene. Nurşate vist vîrî ke menga temmuze de 36 cinîyî kişîyayî û Gulîstane Doku ra zî 216 rojan ra nata xebere nêna girewtene. 

Nurşate vat: ''Ma seba heqanê xo vanê ke Peymana Îstanbulî wa bêra caardene. Her roje cînayetê cinîyan zêdîyenê la reyna zî Peymana Îstanbulî ser o nîqaşî estê. Kesê ke wedaritişê Peymane anê rojdem mesuldarê nê cînayetan ê. Ganî cinî, multecî, domanî bi qanûnan bêrê pawitene. Seba ke cinîye her roje û saete xo biresnê ci wa merkezê şêwirmendîye û bextwaştişî bêrê awankerdene.''