Wendekara Zanîngehê Munzurî  Gulîstane Doku 5ê çeleyê 2020î de Dêrsim de dîyaye vînîkerdene. 7ê adara 2020î de babîyê verguman Zeynal Abarakovî Engîn Yucelo ke polîs o, waşt ke keyeyê xo bar bikero. Aygule Doku nêverda ke bê ke keye de cigêrayîşo krîmînal bêro kerdene keye bar bikero. Engîn Yucelî vera Aygule Doku dewaya tazmînatî akerde. 

Ewro roniştişê dewa yeno kerdene. Keyeyê Gulîstane Doku vizêr ame Dêrsim û verê Edlîyeya Dêrsimî de çalakîya roniştişî kerde. Keyeyê Gulîstane Doku roniştişî ra verî verê edlîye de eşkerayîye kerde. Endamê Platformê Cinîyan ê Dêrsimî zî tewrê eşkerayîye bîyî.

Dadî Bedrîye Doku vat: ''Ez dadî ya, cigêrê mi vêşeno. Ez dewlete ra çîyêk nêwazena, têna kênaya xo wazena.''

Aygule Doku da zanayene ke wextê çalakîya roniştişî de polîsan hêrişê înan kerd. Aygule Doku polîsanê der û dora xo rê vat: ''Wezîfeyê şima dormeyê mi de barîkatan ronayîş nîyo. Wezîfeyê şima oyo ke waya mi bivînê û faîlan muhakeme bikerê.''

Polîsan qiseykerdişê Aygule Doku pê vateyê 'Ti nêeşkena verê edlîye de biqîra' asteng kerd.

Dima keye derbazê salona roniştişî bi. Endamê Platformê Cinîyan ê Dêrsimî û rojnamegerî nêameyî girewtene zereyê salone. Endamê Platformî nêrazîbîyayîşê xo mojnenê û verê berê edlîye de vindenê.