Dayîkê Şeme seba ke aqûbetê vînîbîyayeyanê xo pers bikerî, reya 704. vernîya Şûbeyê Stenbolî yê Komeleya Heqê Merdiman (ÎHD) de ameyî têhet û waştî ver bi Rasteyê Galatasarayî rayîr ra şêrî. Destê dayîkan de fotografê vînîbîyayeyan estbî û polîsan hêrişê grûba çalakgêran ke mîyanê ci de Hemsereka Partîya Demokratîke ya Şaran (HDP) Pervîn Buldane zî estbî, kerd. Polîsan bi hêrişî hewl da çalakgêran dekî mîyanê awanîya ÎHDyî.

Çalakgêrî bi siloganan cewab dayî polîsan. Rojnamegerî warê çalakîye ra ameyî durî kerdene û hêrişê polîsan dewam keno.

‘MA FEK GALATASARAYÎ RA VERANÊDANÎ’

Îzehet hetê Îkbal Erene ra ameye kerdene û Erene wina va: “Ma hewteyo 704. de yî. Ma heta nika seba ke neslê neweyî heqîqetan bimusî û dejanê neweyan nêcuyî, heqê xo waşt. Ma waşt ke wa dewlete berpirsîyarîya xo bîyaro ca. Ma vînîbîyayeyanê xo wazenî. Galatasaray mekanê ma yo û ma fek Galatasarayî ra veranêdanî. Seba ke ma heqê xo nêgêrî, Beyoglu bitemamî girîyaya binê abluqayî. Vera waştişê ma yê edaletî de sîlehê giranî ronîyayî.”

Îzehet ra dima dayîkî bi silogananê ‘Rûmetê merdimîye do zorê îşkenceyan bîşêro’ vera xo dayî awanîya ÎHDyî û derbazê ewja bîyî.”

Abluqayê polîsan û vindetişê dayîkan dewam keno.