Têgêrayîşê Cinîyan ê Azadan ê Kurdîstanî (RJAK) derheqê şîdetê camêrdanê Kurdîstanê Federeyî û Iraqî de eşkerayîyêke daye. Goreyê eşkerayîye adare ra nata herêma Kurdîstanî de 28 cinîyî ameyî qetilkerdene. Reyna serebûtê tecawuzî û îstîsmarê domanan zî zêdîyayî.

RJAKî îfade kerd ke Iraq de serebûtê kişîyayîşê cinîyan û tecawuzî Herêma Kurdîstanî ra zêdêr ê. RJAKî vat: ''Cinîyî benê qurbanê rewşa sîyasî ya Kerkûk û Xurmatû, alozîya mabênê hêzan ê sîyasîyan, nîjadperestî û  cerganê DAÎŞî.''

RJAKî da zanayene ke xebitnayîşê kundoxî mîyanê cinîyan de zî vila bi û rewşe zaf bitehluke ya.  RJAKî venga cinîyan da ke wa seba heqanê xo bixebitê û ard ziwan ke ê zî prosesê pandemî de xebatanê xo yê seba cinîyan dewam kenê.