Dima ke vîrusê Korona hetê Rêxistina Weşîye ya Dinya (WHO) ra sey pandemîye ame îlankerdene xeylêk welatan de karantîna ameye caardene. Karantîna ra semed komel keye de maneno. Hetêkî ra qesawetê komelî zêdîyayî hetêkê bînî ra zî şîdet û qirkerdişê vera cinîyan zêdîyayî.

Goreyê doneyanê ke pawitoxan û dezgehanê heqanê cinîyan eşkera kerdî adara 2019î de 1.804 rey şîdetê zereyê keyeyî ame meydan. Emser heman menge de na hûmara resaye 2 hezar û 493 serebûtan. No done goreyê muracatê cinîyan ame parekerdene. Zaf cinîyî estê ke rîyê mêrdeyanê xo ra nêeşkenê muracat bikerê coka yeno texmînkerdene ke hûmara zêdêr a.

Sereka Komeleya Cinîyan a Rosa Adalet Kaya derheqê babete de ANFyî reyde qisey kerd.
Adalet Kaya vat: ''Wextê peyênî de keye seba cinîyan bi cayêkê bêasayîşî ke tede şîdet vînenê, keda înan yena werdene û sey çin yenê hesibnayene. Atmosferê îzolasyonî wexto ke komelî reyde beno yew meseleyê pîlêrî yenê meydan. Camêrdê ke vera cinîyan şîdet kenê seba ke şîdetê xo binimnê cinîyan komelî ra visnenê dûrî. Mendişê keyeyî hem beno sebebê zêdîyayîşê şîdetî hem zî nimnayîşê nê şîdetî.

Komeleya ma nê prosesî de paştdayîşê xo yê seba cinîyan dewam kena. La ez wazena naye zî îfade bikera ke meqamê edlîyî û îdareyî nê wextî de şîdetê vera cinîyan sey rewşêka sereke nêvînenê. Hêzê asayîşî zî seba ke cinîyan îqna bikerê înan erşawenê keye Ganî Wezaretê Polîtîkayanê Komelî û Keyeyî nîzamnameyêk bierşawo û qanûnê 6284 ca bîyaro. Ganî meqamê edlîyî û îdareyî cinîyanê ke maruzê şîdetî benê sey meseleya sereke bivîne û goreyê qanûnî bire bigêrê û biranê seba pawitişê cinîyan bigêrê.''