Konferanso 3. pê şîarê ''Çapemenîya cinîyan vengê neteweyê demokratîkî yo'' şaristanê Qamişloyî de ame kerdene. Rojawanî ra 86 delegeyî beşdarê konferansî bîyî. Posterê Rayberê Şarê Kurdî Abdullah Ocalanî, fotografê kedkaranê çapemenîye yê ke şehîd bîyî û pankartê pê ziwanê erebkî û kurdkî salona konferansî de ameyî daliqnayene.

Sereka Komîteya Rayberdişî ya Meclîsê Sûrîyeya Demokratîke (MSD) Îlhame Ehmed destpêkê konferansî de qisey kerd û îfade kerd ke kurdî û armenîyî rastê xeylêk qirkerdişan ameyî la seba ke nê qirkerdişî nêameyî dokumenkerdene delîlê ci zî çin ê. Îlhame Ehmed ard ziwan ke coka ganî çapemenîye serebûtan bi hawayêkê zelal û sîstematîkî teqîb bikerê.

Îlhame Ehmed vat: ''Çapemenîya cinîyan zêdêr bale nêancenê rewşa cinîyanê Rojawanî ser. Ganî merdimî nê serebûtanê Rojawanî nêzdî ra teqîb bikerê. Ça de bena wa biba ganî bale bêra antene rewşa cinîyan ser. Ez hêvî kena ke no konferans beno cayê nîqaşê meseleyanê cinîyan.''

Qiseykerdşê Îlhame Ehmed ra dima 5 delegeyî seba îdareyê konferansî ameyî weçînayene. Dima zî ercnayîşê Rayberê Şarê Kurdî Abdullah Ocalanî yê derheqê çapemenîye de ameyî wendene û nîqaşî dest pêkerd.

Konferans de Yewîya Çapemenîya Cinîyan (YRJ) ronîyaye.

Peynîya konferansî de Endama Heyetê Hemserekîya PYDyî Foza Yusif qisey qer û vat: ''Ganî ma fikr û îradeyê cinîyan aver berê, hîşmendîya cînsî çin bikerê. Pê na awanîye çapemenîya cinîyan do biba gamêka newîye û bikalîte û waştiş, raştî û fikrê cinîyan do eşkera bibê. Rolê çapemenîya cinîyan zaf girîng o. ''