Şîdetê serê cinîyan nê wextê Korona de bi zêdîyayîşî dewam keno. 20 rojanê peyênan de 18 cinîyî hetê camêrdan ra ameyî qetilkerdene. Selahîyetdarê dewlete ke vera şîdetê serê cinîyan qet tedbîrêk nêgênê bi rojanê vanê' keye de bimanê.' Vervatoxa TJA Ayşe Gokan derheqê babete de ANFyî rê qisey kerd.

Dewlete cinîyan nêpawena vera înan têgêrena

Gokane ard ziwan ke înan texmîn kerdêne ke  nê rojanê Korona de şîdet bizedîyo û vat: ''Ma vera naye tay tedbîrî girewtî la seba ke dewlete heme dezgehê cinîyan qefilnayî tedbîrê ke ma girewtî veng vejîyayî. Tirkîya de dewlete qet cinîyan nêpawena û heme destkeweyanê cinîyan zî destê înan ra gêna. Camêrdê ke cinîyan qetil kenê xora dewlete ra paştî gênê. Îqtîdar her tim qetilkaranê cinîyan paweno. Hûmkatê AKPyî bi qanûnanê ke vejeno wazeno ke cinîyî camêrd û dewlete rê hewcedar bê. Keye de zî camêr xo sey dewlete vîneno. Eke cinîyî vera nê hêrişan bihêz nêbî hîna zaf raştê hêrişî yenê.  Dewlete bizanayîş na stratejî rayra bena. La cinî bêçare û têna nîyê, dezgehê têkoşîn û xoverdayîşî ardê ra.''

Tarîxî ra nata dewlete tim verê qetlîamanê cinîyan akerdo

Gokane wina dewam kerd: ''Şîdet û qetilkerdişê vera cinîyan bi hetkarîya dewlete yenê kerdene. Camêrd têna nêeşkeno nê qetilkerdişan bikero. Rayîr û tewiranê ci dewlete ra museno. Vîrusê Korona tewr zaf cinîyan û qijan ser o tesîr keno.  Seba ke ê tim zere de yê hîna zaf raştê şîdetê camêrdî yenê. Selahîyetdarê hukmatî tim semedê keye de mendişî veng danê la vera şîdetê serê cinîyan qet tedbîrêk nêgênê. Tarîxî ra nata dewlete tim verê qetlîamanê cinîyan akerdo.  Mesela tayînan bi tecawuzkaranê înan û tayînan zî serranê qijan de zewijnena. Cinîyan vera şîdetê camêrdan dezgehê xo awan kerdî. Têna Amed de 16 buroyê cinîyan estbî. La dewleta ke nêeşena vera hêzê cinîyan de vindero dest nê hemeyan ser. Coka goreyê ma cinîyê ke qetil benê bi destê dewlete qetil benê.''

Korona û qeyûm sey yewbînan ê

Gokane bale ante hêrişê vera şaredarîyanê Kurdan û vat:'' Nê rojanê ke heme dinya vera janê Korona têgêrena hukmatê AKP-MHPyî şaredarîyê xesp kerdî. Nê rojan de zî dişmenîya xo ya vera kurdan domnenê. Îdareyê xoserî heme dinya wayîrê rol û mîsyonêkê girîng ê. Xeylêk welatanê serdestan xoverdayîşê şaran qebûl kerd. Seba ke îqtîdaro merkezî nêeşka problemanê komelî çareser bikero selahîyet da îdareyanê herêmîyan. Zafê welatî bi sîstemanê xoserîye, federasyon û kantonan yenê îdarekerdene. La tirkîya de îqtîdar hêrişê destkewteyanê herêmî keno. Kam şaredarîya kurdan ke vera Korona xebate rayra berde hetê hukmatî ra ameye xespkerdene. Seba ke îdareyê herêmî problemanê şarî çareser kenê hukmat vernîya înan gêno. Ewro her kes vera janê Korona têgêreno la derdê AKPyî oyo ke Kurdîstan bîgêro ablûqa û destkewteyanê şarî destê ci ra bîgêro. Xora qeyûmî sey vîrusê Korona yê. Nê vera kurdan dişmenîye kenê. Dewlete  dişmenîye cinîyan stratejîyêke rayra bena. Seba ke şaredarîyê kurdan cayê cinîyan de yê bîyê hedefê îqtîdarî.''