Endamanê Xelisîyayîşê Cinîyan şîdetê camêrdan ê vera cinîyan û hedefkerdişê Peymana Îstanbulî Kadikoy de protesto kerdî.

Cinîyan zîncîro mor viraşt û heta Operaya Sureya  rayîrî ra şîyî. Cinîyan rayraşîyayîşî de sloganî vatî û pankartî akerdî. Esra Can nameyê Xelisîyayîşê Cinîyan ser o eşkerayîye wende û da zanayene ke serra 2019î de 474 cinîyî, dewirê AKPyî de tewr tay 10 hezar cinîyî hetê camêrd-dewlete ra ameyî qetilkerdene. Esra Can venga cinîyan da ke vera nê qirkerdişan bêveng nêmanê û vajê 'Ma do qebul nêkerê, bîat nêkerê!' Esra Can bale ante ser ke îqtîdar Peymana Îstanbulî keno hedef û ê do heta peynî vera naye têkoşîn bikerê.

Eşkerayîye ra dima cinîyî rixmê astengîya polîsan zî destê înan de resimê cinîyanê ke ameyî qetilkerdene verê Operaya Sureyya ra ver vi Parka Mehmet Ayvalitaşî şîyî. Cinîyan resimî daranê parke de darde kerdî û hîkayeyê nê cinîyan wendî.

Çalakîye pê sloganê ''Ma hîş nêkenê, nêtersenê, îtaat nêkenê'' qedîyaye.