Fatma Guler (75) qezaya Xozatî ya Dêrsimî de tepişîyabî û erşawîyabî  Zîndanê Şakranî yê Îzmîrî. Fatma Guler de sey kanser, astim, tansîyonê berzî ûsn xeylêk nêweşîyî estê. Rewşa weşîye ya Fatma Guler krîtîk a.

Avûkatê dayîke Alî Aydinî pare kerd ke înan seba veradayîşê Fatma Guler muracat kerdbi la waştişê înan nêame caardene.

Aydinî vat: ''Fatma Gulerî verî amelîyat bibi û tede kîst vejîya. Kîstê ci vera beno pîlêr. Fatma Guler nê kîstî ra nêeşkena rabikewa, goşê ci dejenê, kîst bedenê ci rê vila beno. Fatma Guler 2012 de wexto ke heywanê xo çarnayêne Xozat de operasyon estbi leşkeran tira vat wa bizan bigêra şora. Fatma Guler leşkeran rê vato a têna nêeşkena bizan bera û leşkeran ra ardim waşt. O çax Fatma Guler bizanê xo ra bi zazakî nengan çînena la leşkeran îdîa kenê ke Fatma Guler înan rê nengî çînayî.

Leşkerêkê kurmancî vato aye pê ê vateyan mesaj da koyan. La înan kesêkê kirdî rê pers nêkerd. Dêrsim de bi kirdkî qisey keno. Ganî leşkeran manaya vateyan yewê kirdî ra pers bikerdêne. Leşkeran hetkarîye ra a tepişte. O çax çewî zî avûkatîya ci nêkerde. Cezaya 5 serran û 3 mengan dîyaye ci û a 2018î ra nata tepişte ya.''

Aydinî eşkera kerd ke Fatma Guler rixmê raporê 'nêeşkena nêweşxane de bimana' yena tepiştene û vat: ''Fatma Guler hele ke nê prosesê janî de nêeşkena zîndan de bimana. Cara cezaya ci tay menda. Goreyê qanûnî ganî bêra veradayene. Ma muracatê qanûnê înfazî zî kerd. La semedo ke Fatma Guler 'endamîya rêxistine' ra muhakeme bîye qanûnê înfazî seba ci derbazdar nîyo.''

Alî Aydinî da zanayene ke dayîke Fatma de kanserî ra heta astimî xeylêk nêweşîyî estê û vat: ''Ganî bêhesab û bêbazarîye Fatma Guler û pêro tepişteyê nêweş û kokimî cade bêrê veradayene.''