Qezaya Xozatî ya Dêrsimî de 2012 de dayîke Fatma Guler (75) tepişîyaye û cezaya zîndanî ya 5 serran dîyaye ci. Dayîke Fatma 2018î ra nata Zîndanê Aydinî de tepişîyayêne û uca ra erşawîyaye Zîndanê Şakranî. Dayîke Fatma de astimî ra heta kanserî xeylêk nêweşî estê û rewşa weşîya ci vera bena xirabêre.

Lajê dayîke Fatma Bahtîyar Gulerî derheqê rewşa dadîya xo de qisey kerd.

Bahtîyar Gulerî pare kerd ke dadîya ci verî ke erşawîyaya zîndanî nêweşe bîya û amelîyatê guatrî bîya. Gulerî vat: ''Dima nêweşîya guatrî ya dadîya mi aver şîye. Doktoran vat ganî dadîya mi reyna amelîyat biba. Dadîya mi rayêke zî seba ke zereyê ci dejayêne şîya nêweşxane û musaya ke tede kîst esto. Dima ke kîstê ci ame girewtene metabolîzmaya ci xeripîyaye. Dadîya mi xoza ra zaf hes kerdêne coka keyeyê co hewilna Xozatî. Raşta zî xozaya Xozatî ci rê bîye şîfa.''

Bahtîyarî qala tepişîyayîşê dadîya xo wina kerde: ''Dadîya mi bena şahîda pêkewtişêkî û tepişîyena. Ganî peynîya tebaxe de dadîya mi zîndanî ra vejîya. Ma wazenê wa dadîya mi hînî zîndan de nêmana wa keye de cezaya xo bianca. Çunek eke a zêdêr zîndan de bimana nêweşîya ci zî aver şina. Ma muracatê Serdozgerîya Komare kerd la înan vat sûcê 'terorî' nênê efûkerdene. Nika têna paştdayîşê medya eşkeno hetkarîya ma bikero. Ma paştdayîş wazenê. Noyo ke dadîya mi rê yeno kerdene sûcê merdimîye yo.''