Aktîvîsto kurd Mehmet Çakas o ke rîskê tebersînorkerdişî rê rî bi rî yo bi rayîrê avûkatê xo rayapêroyîye rê mesaj şawit. Avûkat. Dr. Björn Elberlingî bado ke Zîndanê Uelzenî de muwekîlê xo zîyaret kerd, eşkerîye daye ANFyî. Dr. Björn Elberlingî ard ziwan ke rixmê şertanê zoran rewşa Çakasî hol a û semedê paştdayîşê ke dîyeno ci û xebata ke vera tebersînorkerdişê ci yena kerdene keyfweş o.

Elberlingî mesajê Mehmet Çakasî  "Ê ke teber de semedê mi têkoşîn kenê, ez înan pêrune rê selam kena " pare kerd. 

Elberlingî vat înan vera qerarê tebersînorkerdişî Mehkemeya Qanûnê Bingeyî yê Almanya rê muracato lezabez kerd. Yeno pawitene ke qerar rojanê verê ma de bewlî bibo.

Mehmet Çakas Kam o?

Mehmet Çakaso çewlîgij aktîvîstêko kurd o ke hemwelatîyê Tirkîya yo. Çakaso ke kanûna 2022î bi waştişê meqamanê almanan Îtalya de ame tepiştene, adara 2023yî de Almanya rê ame îadekerdene. Nîsana 2024î de Mehkemeya Eyaletî ya Berze ya Celle bi îdîaya ''endamîya PKKyî'' cezaya 2 serran 10 mengan daye ci. Nika Zîndanê Uelzenî yê Saksonyaya Cêrîne de yeno tepiştene û yeno plankerdene 4ê teşrîna verên a 2025î de bêro tehlîyekerdene.

Muracatê îltîcaya yê Çakasî  hetê Buroyê Multecîyan û Koçî yê Federalî (BAMF) ra ame redkerdene. Mehkemeya Îdareyî ya Luneburgî muracatê vera tebersînorkerdişî bê erjnayîşî red kerd. Serdozgerîye zî înfazê cezaya hepsî peyde ant û verê prosesê tebersînorkerdişê Tirkîya akerd.

AZADÎ e.V.: Zextê rayapêroyî beno ke rewşe bewlî bikero

Fonê Hetkarîya Huqûqî yê AZADÎ e.V. ra Mehmet Demîrî ard ziwan ke nê rojî seba ke dewa rayapêroyî rê bidîyê eşnawitene zaf muhîm ê. Demîrî eşkerayîya xo ya ANFyî de vat, ''Mehmet Çakas gerek verê qerarê Mehkemeya Qanûnê Bingeyî mero tebersînorkerdene. Tirkîya de derheqê Çakasî de di dewayê cîyayî est ê. Ma ewro derheqê nê dewayan de belgeyê neweyî teqdîm kerdî.''

Demîrî hîşyar kerd ke beno ke selahîyetdarî bê pawitişê qerarê mehkeme têbigêrê û bale ante muhîmîya serê çalakîyan ke tesîrê rayrapêroyîye kenê. Peynîyê hewteyî de pêroyê Almanya de çalakîyî do bêrê kerdene. Ca  û saetê çalakîyan hema eşkera nêbîyî.

KON-MED: Gerek qerarê tebersînorkerdişî cade bêro vindarneye

Federasyonê Komeleyanê Kurdîstanî yê Almanya KON-MED) vera qerarê tebersînorkerdişê Mehmet Çakasî nêrazîbîyayîş mojna û vat gerek qerar cade bêro vindarnayene.

KON-MEDî veng da rayapêroyîye, wekîlan û dezgehanê komelê sîvîlî wa dewa nizdî ra teqîp bikerê şirê Almanya ser ke wa no qerar peyser bêro antene. KON-MED vat têna vindarnayîşê tebersînorkerdişî nê gerek Almanya de proseso edîl yê îltîca bêro kerdene.

Cansu Ozdemîr: Kesê ke raştê zulmê sîyasîyî yenê nêeşkenê bêrê tebersînorkerdene

Kesê vera tebersînorkerdişê Mehmet Çakasî têkoşîn kenê înan ra yew zî vervatoxa polîtîkayanê teberî yê Partîya Çepe  û Wekîla Hamburgî Cansu Ozdemîr a. Cansu Ozdemir semedê hîsgêrîye veng da rayrapêroyîye û dezgehanê eleqedaran.

Cansu Ozdemîra ke ANFyî rê qisey kerd, nê vatî: ''Mehmet Çakas Tirkîya de tepiştişê sîyasî rê rî bi rî yo. Kesê ke raştê zextê sîyasîyî yenê welatê înan rê peyserşawitişê înan binpaykerdişê heqanê merdiman o. Gerek ca de qerarê tebersînorkerdişî bêro vindarnayene û proseso edîl yê îltîca bêro rayra berdene.