Koordînasyonê KJK’yî ra Rewşan Mêrdîne Stêrk TV de rojdem ercna.

Mêrdîne bale ante polîtîkaya hukmatê Başûrî ser û va: ‘’Ê hesabanê xeletan kenê û gamanê xeletan erzenê. Hêrişê vera Başûrê Kurdistanî teyna eskerî nê, heman wext de sîyasî yo. Eke ewro hukmatê Başûrê Kurdistanî vera îşxalî vengê xo nêvejeno no yeno na mana ke nê îşxalî de bara înan zî esta. Şarê ma yê Başûrî vano ke, ‘’Ma zanê mesele PKK nêyo, mesele projeyê çînkerdişê Kurdan ê Osmanîyan o’’. Hukmatê Başûrî xo sey temsîlkarê Kurdan vîneno. Eke raşta Kurdan temsîl kenê wa nê polîtîkayan bivejê werte. Ê ke vera îşxalî yê xo eşkera bewlî kerd. Vera îşxalî îmzayî arê dayî. No çîyêko muhîm o la bes nîyo. Şarê Kurdî ganî vera nê îşxalî hurzo lingan ser. Metodê naye zî bewlî yo.’’

Mêrdîne hukmatê Başûrî hîşyar kerd û wina dewam kerd: ‘’Wa hukmatê Başûrî naye hol bizano ke, eke PKK çînêbo ê zî çîn benê. Seba hukmatê Başûrî teyna yew rayîr esto o zî kiştê şarî de vîndertiş o. Ewro şerê dinya yo 3. yeno ciwîyayene. Ma zî sey hêzêk ke verê çimî de yo ganî sîstemê neweyî de wayîr heqanê xo rê bivejîyê.’’

Mêrdîne vist vîrî ke şeran ra tim tewr zaf cinî û domanî zirar vînenî û va: ‘’Çi heyf o ke Başûr de her tim şer esto. La na rey no şer zaf bihet o. Bi nê şerî Başûr de tacîz, tecawuz û dizdîye vejîyayî werte. Ganî cinîyî vera naye tewirêkê rêxistinkerdeyî ramojnê. Nika Başûr de Hêzê Xopawitişî ameyî ronayene. Babete teyna eskerî nîya. Ganî cinîyî her hetî ra xo bipawê û cimatî rê rayberîye bikerê. Çalakîyê Mertalê Ganeyan ê ciwanan ê ke Bradost û Qendîl de yenê viraştene zaf muhîm ê. Ma nê çalakgeran silam kenê.’’

Rewşan Mêrdîne qiseykerdişê xo wina qedîna: ‘’Rayber Apoyî seba HDP’yî xeta rayîrê 3. bewlî kerde. Eke na xete raşt bêro wendene û rayraberdene netîceyanê xurtan fînena dest. Weçînitişê Stenbolî de ame dîyene ke şar rejîmê yew merdimi nê, sîstemê parlamenterî wazeno. Nika destê hetanê demokratîkan de firsendo gird esto. Tîfaqo Demokratîk xetê 3. esas geno. Coka tîya rolo gird ê cinîyan o. Ganî cinîyî naye rê rayberîye bikerê.’’