Çawişê pisporî yê artêşa tirke Musa Orhanî Êlih de tecawuzê cinîyêka 18 serre kerdbî la dima ke di rey ame destbendkerdene reyna ame veradayene. Rêxistinanê cinîyan seba ke vera veradayîşê Musa Orhanî nêrazîbîyayîşê xo bimojnê twitter ser o bi etîketê ‘TecavuzSuçtur Aklanamaz' (Tecawuz sûc o, nêno mîyankerdene) kampanya daye destpêkerdene.

Parekerdişê rêxistinanê cinîyan wina yê:

Kampus Cadilari: Tecawuzkerdî kuçeyan de destê xo şanê tê û sayê dewlete gêrenê!

Paştdayîşo Mor: Bêcezatîye polîtîkaya dewlete ya. Qetilkerdişê cinîyan polîtîk o. Sûcdaran mepawê, hukm bikerê, Peymana Îstanbulî bîyarê ca! Musa Orhan tepişê!

Meclîsê Cinîyan ê DBPyî: Ma hîşmendîya tecawuzkere û kiştoxe nas kenê.

Meclîsê Cinîyan ê HDPyî: Peymana Îstanbulî ya ke îqtîdar û îdarekarê ci xo rê kenê hedef, vana ke tecawuzker sûcê xo ra nêno efûkerdene.

Platformê Cinîyan ê Şahmarane yê Mêrdinî: Peymana Îstanbulî do xîretê şîdetê vera cinîyan berteref bikera. Îdarekarê dewlete, erkdarî ganî goreyê peymane têbigêrê.

Kolektîfê Cinîyan ê Zanîngehan: Ma do kuçe û meydanan nêteriknê. Ma edaletê camêrdan nê edaletê raştikênî wazenê! Heta ke ma azad nêbê hêrsê ma nêkemîyeno!

Xelisîyayîşê Cinîyan: Dewlete tecawuz sey metodêkê îşkencetî xebitnena, reyna bêcezatîye sey parçeyêkê na polîtîka dana dewamkerdene. Ma sey cinîyan dewlete-camêrd hol şinasnenê. Musa zî Zaynal zî ê yewînî nîyê.

Cinîyê Ciwanî yê Azadî: Dewleta ke Musa Orhan vera dayo, qasê tecawuzker sûcdar o! Çimanê xo qetilkerdişê cinîyan megêrê, êyê ke Peymana Îstanbulî asteng kenê kiştoxê pêro cinîyan ê!

Cinîyê EMEPî: Musa Orhano ke êlih de tecawuzê Îpeke Er kerd ame veradayene! Vera tecawuzkeran û ê kesanê ke kiştoxanê cinîyan pawenê ma sere wedarenê! Bêcezatîye seba pêro cinîyan mesajêk o, ma do naye qebul nêkerê!