3ê tebaxa 2014î de DAÎŞî hêrişê Şingalî kerdbî û êzidîyan rê fermanêko newe ferz kerdbî. DAÎŞî bi desan cinîyî kerdbî kole, carîye û kiştî. Hema zî aqîbetê tay cinîyan ê êzidîyanê ke destê DAÎŞî de bîyî nêzanîyeno.

Nûhate ê cinîyan ra yew a ke şerê estbîyayîşî de serkêşîye kerde. A wazena rêçanê fermanî werte ra wedarna, raştîya xo û cinîyan dinya rê vaja. Beşê diyînî de Nuhate qala îxanetî û qehremanîye kena:

''Her kesî DAÎŞ eşnawitbi, ma înan rê vatêne cehş. DAÎŞî verî xo resnabi Tileferî. Ma zanayêne ke DAÎŞ hînî hêrişê Şingalî bikero. O çax şîayê Iraqî xo Şingal de nimitêne. Serê sibayî yê 3ê tebaxa 2014î telefon ame, vatêne DAÎŞî nêmeyê şewe hêrişê dewanê Gir Zerik û Siba Şêx Xidirî kerdo. Wexto ke camêrdî kişîyayî û cinîyî ameyî remnayene ma pê tehluke hesîyayî. Her kesî dest pê nobete kerd. Babîyê mi zî hetê PDKyî de têgêrayêne. Babîyê mi vatêne qey PDK do şer bikero. Wexto ke PDK û hêzê Iraqî remayî babîyê mi kerd ke xo birensê koyan. Ma vatêne qey DAÎŞî do hêrişê hîrê cayan bikero û dima xo apey bianco. Ma nêzanayêne ke o ke ameyo ma sereyî ferman o. Koy de hînî merdimî zêdîyayêne, erzaqê ma qedîya. Her kesî vatêne hêzanê PDKyî ma rotê û babîyê mi hînî verê ney de çîyêk nêvatêne.

Wexto ke DAÎŞî xo resna dewa Borik û dewanê dormeyê ci hînî ters kewt zerrîya her kesî. Ma koy de bêhêvî bîyî. Ma pabeyê mergî bîyî. Wextê fermanî de rojî germ şewî serd bîyî. Domanî nêeşkayêne daymîş bibê. Yew amadekarî yan zî tedbîrê ma zî çin bi. DAÎŞî Borik û çend dewî visnabî destî. Çend rojî derbaz bibî. Rojêke Qasim Şeşoyî venga serekeşîran da ke rewşe ra biewnê, birêke bigêrê. Ez xale û kênayêke zî ma verê înan de nobete girewtêne. Qasim Şeşoyî veng da ke wa her kes çeka xo bîyaro hetê ci. O çax DAÎŞî eşt uca ser. Bi nê hawayî dormeyê Şerefedînî zî ame girewtene. Cebilxaneyê ke destê ma de bîyê zî şîyê. 

Rojêke her kesî qala gerîlayan kerde, vatêne gerîlayî ameyê Şingalî la ma nêdîbî. Ez, dadîya mi, xalê mi ma bêsebr pabeyê înan bîyî. Vatêne 12 siwarî ameyê. Ê zî embazî Dilşêr, Memo, Hedar, Agît, Serxwebûn û ê bînî bîyî. 12 gerîlayî bîyî, 12 siwarî bîyî. Înan verî Qendîl de bi hezaran merdimî xelisnabî. Keyeyanê ke Çilmêra ra ameybî Şerefedînî qala qehremanîya gerîlayan kerdêne. Ma pêro pabeyê mergî bîyî la ameyîşê gerîla her çi vurna. Hela tewr tenge de estbîyayîşê gerîlayan zaf rind bi. Xalzayê mi Silêmanî ra telefon kerd vat 'Ma hê gerîlayan reyde yenê, wa her kes xo ver bido. Êzidatîye do nêqeda.' Ma her kesî rê vat ke gerîlayan seba ma şerêko pîl dayo destpêkerdene. Verî her kesî bawer nêkerd. Îxanetî ra dima hinî qala qehremanîye û hêvî ameyêne kerdene.

Ma vengê şerê seba korîdorî eşnawitêne. HPG, YJA Star, YPG û YPJ vera DAÎŞî û îxanetî, seba êzidîyan şer kerdêne. Bi seyan gerîla û şerwanî şehîd bîyî la peynî de korîdorê merdimîye ame akerdene. Gerîlayan wesayîtî zî ardbî, înan verî nêweşî, kokimî siwarê wesayîtan kerdî. Ma dewa Dugirî ra heta sînorê Rojawanî şîyî. Gerîlayan awe û nan dayêne ma; kokim û domanî girewtêne xo paştî. Wexto ke ma resayî Rojawan çîyo ke ma dî tesîrê her kesî kerd. Domanê qijî ameybî verê ma. Domanê 6-7 serrî pê şûşeyanê awe pabeyê ma bîyî. Na awe ma rê bîya cuye. 

Ma şewêke serê sînorê Başûr û Rojawanî de mendî dima ma derbazê Başûrî bîyî. Başûr de ma 6 mengan dibistanêke de mendî. Ma waştêne Rojawan de bimanê la apê ma û dormeyê ci ma xapînayî. Na dibistane de têna simêr û nan dayêne ma. Ma kerdêne rêz, kaxizêk dayêne destê ma. Sey koleyan ewnîyayêne ma ra. Rûmetê ma şiknayêne. Na rewşe zorê dadî, way û birayê mi zî şîye. Dima ma reyna şîyî sînorê Rojawan û Başûrî. Ma wextêk tîya de mendî. Ma debara xo bi zehmetî kerdêne. 

Dima ke ma Şingalî ra vejîyayî DAÎŞî hêrişê korîdor kerdo û qefilnayo. Embazan reyna bi şerî korîdor akerd û ma 2015 de agêrayî Şingal. Mi hînî waştêne ez biba gerîla. Şingal de ez tewra raştîye bîya. Mi bire dabî; hînî qet yew çi do sey verî nêbo. 

Wexto ke ma agêrayî ma şîyî dewa Yusufan. Merkezê Şingalî û dewê dormeyê ci destê DAÎŞî de bîyî. Wexto ke mi gerîlayê YJA-Star, şerwanê YPJyî dîyî mi waşt ke ez biba sey înan.E tewra Hemleya Azadîye ya Şingalî bîya. Wexto ke mi embazî Dêrsime Kobanê, Hedar û şehîd Çîya dîyî ez binê tesîrê înan de menda. Înan hem şer kerdêne hem zî nan dayêne şarî. Gerîlayan mi rê vat ke ez waranê têkoşînî yê hetê şarê xo de ca bigêra. Bi taybetî serkêşîye embaze Hedare zaf tesîrê mi kerd. A 12 siwarîyan ra zî yew bîye. Ez hînî înan reyde menda. 2017 de ez bîya parçeyêkê nê têkoşînî. 2019 de sey cinîya êzidîye mi waşt ez rojnamegerîye bikera. Ganî mi raştîyan biresnayêne her kesî. A roje ra nata ez pê erkê xo têgêrena. Xêrê Rayberîye ra ma xo resna cewherê xo.''