RJAKî da zanayene ke Başûrê Kurdîstanî de emserr zafê ci cinî 238 kesî ameyî qetilkerdene ya zî sey intîxarkerdişî ameyî ramojnayene û waşt ke vera şîdetê serê cinîyan wa çalakî dest pê bikerî.
Rêxistinê Cînîyanê Azadan ê Kurdîstanî (RJAK) şîdetê serê cinîyan û serrgêra 16ê Teşrîna verêne ser o eşkerayîyêk daye.
Refarandûmê Xoserîye yê Başûrî ra dima qewimîyayîşê 16ê Têşrîna verêne ke dest pêkerdbi, serrêk xo dima verda. Nê demî de Xûrmatû de xeylê cinîyan ser o hêrişê cînsîyî ameyî kerdene.
RJAKî dîyar kerd ke bajaranê Kurdîstanî ra her roje xeberê mergê cinîyan yenê û wina domna: ‘‘Goreyê ajansa ma sereyê serra 2018î ra heta nika zafê ci cinîyî 238 kesî ameyî qetilkerdene, ya zî xo kiştê. Zîhnîyeto faşîst yê şerrê îqtîdarî cinîyan hedef geno. Bi nê hêrişan wazenî ke waştişê azadîye ra bi ma peyser gam bidê eştene. La xoverdayîşê ma bi qerarîye dewam keno.
VENGDAYÎŞ
RJAKî seba serewedartişî veng da û va: ‘‘Dişmeno ke herra ma rê destê xo derg keno û ganî vera nê ma wirzê lingan ser o. Seba vernîya şîdetê vera cinîyan girewtişî ganî vernî de Başûr heme leteyê Kurdîstanî de çalakîyî bêrî viraştene. Şarê kurdî vera qetilkerdiş û şîdetî ganî dest bikero çalakîyan.‘‘
