Dima ke janê vîrusê Korona pêro dinya de vila bi karantînaya keyeyî ameye caardene. Karantîna keyeyî reyde şîdetê zereyê keyeyî zî zêdîya. Goreyê raporê Neteweyanê Yewbîyayeyan Ewropa û Rojhelatê Mîyanênî de xeylêk cinîyî marûzê şîdetê mêrde, bira û babîyanê xo benê. 

Hetê bînî ra Rojawanê Kurdîstanî de rewşe zaf cîya ya. Rojawan de ke cinîyê ci wayîrê destkewteyan ê pîlan ê, pê sayê modelê hemcuye şîdetê vera cinîyan zaf kêmîya. Bi taybetî ronayîşê Îdareyê Xoserî ra dima şîdetê vera cinîyan û şîdetê zereyê keyeyî zaf bîyî tay. Îdareyê Xoserî seba ke verê şîdetî bigêro zaf qanûnî zî vetî.

Rojawan de 23ê adare de semedê vîrusê Korona ra qedexeyê vejîyayîşê teberî ame îlankerdene. A roje ra nata şarê Rojawanî wextê xo keye de derbaz keno.

Taxa Erbewîyê ya Qamişloyî ra Zehra Ebdulkerîm vat: ''Bira qedexeyê vejîyayîşê teberî ra nata ma keye de yê. Mabênê mi û mêrdeyê mi de meseleyêk nêvejîyaye. Ma tim hûrmetê yewbînan kenê.''

Mêrdeyê Zehra Rafî Ebbasî zî vat: ''30 serrî yo ke ma pîya ciwîyenê. Meseleyanê qijan ra ber mabênê ma de meseleyêke nêvejîyaye.''

Taxa Hilêliyê ra Bêrîvane Bedir Mihemed zî vat: ''Ma pabesteyê tradîsyonê komelê xo yê. Dinya de şîdetê vera cinîyan zêdîyeno la tîya de pê sayê tradîsyonanê ma şîdetê vera cinîyan çin o. Pê sayê qanûnan û perwerdeyê hemcuye şîdet çin o. Cinîyî zî camêrdî zî heqanê xo zanenê.''