Rojnameyê cinîyan Newaya Jin ke aşme de reyêk vejîyeno, na aşme zî bi muhtewayêka debîyaye yeno wendoxan ver. Hûmara neweyî de Komploya Mîyanneteweyî ya 9ê Teşrîna verêne ra heta şewatê daristanan û qirkerdişê tebîetî, qetilbîyayîşê Saray Guvene û huqûqê almanan, rojnamegerîya cinîyan û medyaya alternatîfe xeylê babetê bînî estî.

Na hûmare de Raperîn Mûnzûre şehîdanê aşma teşrîna verêne ser o nuşto û Zeynep Kizilirmake zî derheqê 7ê teşrîna verêne Roja Rojnamegeranê Cinîyan de nuşto û bale anto rojnamegerîya cinîye ser.

ZEBANÎYÎ Û PROMETHEUSÊ HEMDEMÎ

Zeynep Esengule derheqê 9ê teşrîna verêne destpêkê Komploya Mîyannetweyî de nuşto û qala têkilîya tecrîd û qirbîyayîşê cinîyan kerda.

Rojda Yildirime qetilbîyayîşê Saray Guvene ser o nuşto û nuşteyê xo de bale ancena rîyê raştî yê huqûqê almanan ser.

Verfeka Tevgerê Ekolojîyî yê Mezopotamya Seher Kadîroglu Ataşe derheqê şewatê daristananê Dêrsimî, rijîyayîşê Heskîfî, Semsûr de virazîyayîşê HES û Îzmîr de virazîyayîşê JESan ser o nuşto û nuşteyê xo de dîyar kerdo ke ganî tebîet reyde aştîye bêro viraştene.

GELO ÎDLÎB TENA ÎDLÎB O?

Nesrîn Navdare krîzê ekonomîke ser o, Bêrîtan Sarya rojeva Îdlîb ser o û Evîn Zîlane neheqîyê rejîmê Îranî ser o nuşto.

Na hûmare de ca dîyayo nuşteyanê vîrardişan yê Eylem Ronî û Zîn Koçere. Reyna ca dîyayo meqaleyanê Nazan Ustundage, Rûşen Celale, Zerya Gule, Rûşen Rengîne, Zîn Zal û Çarçel Engîzeke zî.