Peynîya serra 2018î de serkêşîya Hemsereka KCDyî Leyla Guvene de semedê azadîya Rayberê Şarê Kurdî Abdullah Ocalanî grevê vêşanîye ameye kerdene. Dayîkanê Laçiksipîyan ke semedê qedîyayîşê grevî verê Zîndanê Bakirkoyî de ke domanê înan tede grev de bî, eşkerayîye daye, derheqê înan de dawa amebî akerdene.

Roniştişê dewa ewro Mehkemeya Cezaya Girane ya 13ine ya Bakirkoyî  de ame kerdene. Dayîkan ra Latife Bugday, Surreya Kilinç, Nesibe Başaran, Zubeyde Adar, Selamete Demir, Sineme Guzel, Emine Erbek, Hafize Şahin, Ayşegule Yalçun, Sumanperi Akyildiz, Kumri Akgul û Zehra Dogan pîya bi avûkatanê xo tewrê ci bîyî.

Dayîkan ard ziwan ke seba ke domanê înan rojeyê mergî de bî înan eşkerayîye daye û waşt ke verê mergan bigerê. Dayîkanê laçiksipîyan vist vîrî ke hela ke înan dejo pîl antene û semedê xelisnayîşê domananê xo verê zîndanî de qîrayinê polîsan hêrişê înan kerd û vat: ''Ma semedê eşkerayîye polîsan ra destûr girewtbi. Rixmê naye polîsan hêrişê ma kerd û ma destbend kerdî. Ma bîlasebeb raştê hêrişî ameyî, ma nê sûcan qebûl nêkenê.''

Avûkatan waşt ke polîsê ke a roje wezîfe ser o bî wa îfadeyê înan bêro girewtene û beratê dayîkan waşt.

Heyetê mehkeme qerar girwet ke dayîkan ra Sakîne Yakut ganî tewrê mehkeme bibo, Meleke Başkale bêro destbendkerdene û Zelîha Gun zî bizor tewrê mehkeme bibo. Reyna waştişê avûkatan ame redkerdene û roniştişo bîn 11ê adara 2021î rê peyde eşte.