QSDyî par pare kerdbi ke DAÎŞ hetê fîzîkî ra ame çinkerdene. Naye ra dima sivîlê ke hetê DAÎŞî ra ameybî remnayene azad bîyî. Cinî û domanî zî tede 236 êzidîyê ke DAÎŞî Şingalî ra remnayî hetê QSDyî ra ameyî azadkerdene. Nînan ra yew zî Ronya Faysal a. Ronya hetê îdareyê Kampa Holî ra Keyeyê Êzidîyan ê Cizîre rê ameye teslîmkerdene. 

Ronya qala serebûtê xo, kerdişanê DAÎŞî kerde. Ronya vat: ''DAÎŞ Şingal de hêrişê keyeyê ma kerd. Înan dadîya mi, ez û wayûbirayê mi girewtî, ma berdî Musul. Înan dadîya mi daye camêrdêk, ez zî keyeyêkê sûrîyeyîjî rê rote. Ez û dadîya mi, ma bîyî cîya. Wexto ke ez destê DAÎŞî de bîya ez hetê keyeyê Um Talîbî de mendêne ke ê rûs bîyî. Ez uca de rûskî musaya. Ez şîya zaf cayanê ke destê DAÎŞî de bîyî; Reqa Meyadîn, Baxoz û tewr peyên Kampa Holî. Ez wexto ke destê DAÎŞî de bîya ez qasê di serran xeyme ra nêvejîyaya teber. Mi nêvat ez êzidî ya. Mi rê gef wendêne û vatêne ê do keyeyê mi bikişê. Pê zorî camêrdo ke mi ra 18 serran pîlêr reyde ez daye zewijnayene. Mi facebook de xalê xo reyde qisey kerd. Ey nûmaraya Keyeyê Êzidîyan ê Cizîre daye mi. Mi înan rê telefon kerd, mi va wa bêrê mi bixelisnê. 

Çew nêeşkayêne cayê cerganê DAÎŞî de kurdkî qisey bikero. Êyê ke kurdkî qisey kerdêne ameyêne kiştene. Ma qala remayîşî zî nêkerdêne çunke cerganê DAÎŞî kam biramo ci rê îşkence kerdêne. Seba ke ez dadîya xo ra cîya bîya mi rê zaf zor ameyêne. Ez wazena abigêra Şingal, hetê keyeyê xo. Ez cuyêka bêbombarduman wazena.''

Endamê Keyeyê Êzidîyan ê Cizîre Mehmûd Memî zî derheqê babete de qisey kerd û vat: ''Tay kesî destê DAÎŞî ra zaf erey ameyî azadkerdene. Çunke ê tersayêne, zaf kesan zî vatêne ê musilman ê. DAÎŞî pê kiştişî înan rê gef werdêne. Seba ke ma Ronya Kampa Holî ra bivejê ma bi seatan xîret kerd. Ma do Ronya bierşawê cayê keyeyê ci Şingal.''