Endama komîteya weşîye ya KCK‘yî Rûken Sêrte serrgêra 20’an a komploya mîyanneteweyîye ya 15’ê Sibate de, xoverdayîşê grevê vêşanîye erjnayî. Sêrte destpêkerdişê qiseykerdişê xo de Leyla Guvene û xoverdayoxê bînî selam kerdî û wina va: “Felsefeya Rayberîye hêvî daye komelî û kerd ke  komel agêro rastîya xo ser. Wexto ke Rayber esîr ame girewtene, hewt ra heta heştayî, her kes sey  mertalê adirî dormeyê ey de ame pêser. Şarê Kurdî pêro dewletanê mîyanneteweyîyan rê peyam erşawit û va ma ciwîyayîşêkê bê Apoyî qebul nêkenê. Rayber Apo zî seba şarê Kurdî yeno manaya nasname, îrade û îspatê estbîyayîşî. Hêzanê komplogêran zî, seba ke Kurdan bê îrade biverdê, bê nasname biverdê û çin bikerê hêrişê Rayber Apoyî û felsefeya ey a azadîye kerd.“

LEYLAYAN KOMPLOYE XO VÎR RA NÊKERDE

Rûken Sêrte bale ante mucadeleya Ocalanî ya seba azadîya cinîyan ser û wina dewam kerd: “Rayber Apoyî seba ke cinîyî bibê wayîrê nasname, seba ke bibê azad projeya azadîye afirnaye. Na proje nême mende. Wezîfeyê cinîyan temamkerdişê na projeye yo. Leylayan komploya vera Rayberîye qetîya xo vîr ra nêkerda, qebûl nêkerda û sey komploya vera xo dîye. Leyla Guvene seba temamkerdişê projeyê cinîyanê azadan ê Rayberîye, bi hewayêkê bêemsalî xover dana.“

Rûken Sêrte va bê Kurdan û Ocalanî, rojakewtena mîyanêne de şer nêqedîno, peynîya krîzî nêna û wina dewam kerd: “Bi seyan merdimî, bi felsefe û bawerîya Rayber Apoyî, dormeyê ey de adir ra çeper da girê. Ganî her kes bizano, serkewtiş bi xoverdayîşî beno. Bi komela rêxistinbîyayî ma eşkenîme Rayber Apoyî bikîme azad. Cinîyê Kurdî ganî bi hewayêkê bêemsalî, seba azadîya Rayber Apoyî xover bidê. Rayber Apo tena yew şexis nîyo, o îradeyê mîlyonan o. Ma xoverdayoxanê grevê vêşanîye yê ke dormeyê Rayber Apoyî de bîyê  mertalî silam kenîme.“