Endama Koordînasyonê KJK’yî Zerîn Rûkene, tecrîdkerdişê Rayberê Şarê Kurdî Abdullah Ocalanî, grevê vêşanîye û serewedartişê şarê Şeladizê ANFyî rê ercnayî.

Rûkene da zanayene ke tecrîdkerdişê Ocalanî tecrîdkerdişê heme şaran ê dinyaye yo û vat, “Seba ke Rayber Apo tecrîdkerde yo, esîr o nika Rojakewtena mîyanêne de şer esto. Tena yew hêzo ke bieşko Rojakewtena mîyanêne de şerî vindarno Rayber Apo yo. Seba ke perspektîfê çareserîye yê Rayber Apoyî nêdîyayîşî ra yenê, nika Rojakewtena mîyanêne de xusûsen zî Kurdistan de Şerê Dinya yo 3. qewimîyeno.”

Zerîn Rûkene çalakîyê grevê vêşanîye yê ke bi serkêşîya Leyla Guvene yenê kerdene silam kerdî û vat, “Sere de şarê ma yê Amedî, şarê çar perçeyê Kurdistanî ganî hîna vêşî wayîrê xoverdayîşê Guvene vejîyê, xoverdayîşî xurt bikerê û bi mîsyonê xo yê tarîxkîyî hurzê. Leyla Guvene dest bi çalakîyêka tarîxkîye kerda.” 

 ‘RAYBER APO RAYBERÊ AZADÎYE YO’

Rûkene bale ante serê eşkerayîya Leyla Guvene ya dimayê veradîyayîşê zîndanê Amedî ra û vat, “Vateyê aye xeylî manîdar ê. Vat, ‘Ma heme deyndarê Rayber Apoyî yê.’ No tewirê Leyla Guvene tewirê bi mîlyonan o. Çunke Rayber Apo rayberê bi mîlyonan merdiman o. Tena Rayber Apo nê, şarê Kurdistanî, Tirkîya  û yê Rojakewtena mîyanêne tecrîdkerde yo. Rayber Apo bi serran o bi rengêkê tarîxkîyî xo ver dano. Çîyo ke kewenê mile ma ser no yo ke ma zî bi role xo yê tarîxkîyî yê goreyê mîsyonê Rayber Apoyî tê bigêrê.”

Rûkene vat, “Rayber Apo rayberê azadîye yo. Her kes azadîya xo mîyanê azadîya Rayber Apoyî de vîneno. Tecrîd bi xoverdayîşê cimatkîyî eşkeno bêro wedaritene.”  

GANÎ HUKMATÊ BAŞÛRÎ VERÊ ŞARÎ DE CA BIGÎRO

Endama Koordînasyonê KJK'yî Zerîn Rûkene bale ante nizdbîyayîşê Hukmatê Başûrê Kurdistanî ser û vat, “Hukmatê Başûrê Kurdistanî herinda ke kîşta şarê Şeladizê de ca bigîro, Nêçirvan Barzanî keno ke zerrîya dewleta Tirkî weş bikero. Şarê Kurdistanî naye qebûl nêkeno. Nêbeno ke hendî hukmatê Başûrê Kurdistanî waştişê meşruyî yê şarî ser de şiro û hêrişê şarî bikero. No problem tena binpaykerdişê sînorî nêyo. Xoverdayîşo ke serê nê bingeyî de ame kerdene xeylî muhîm o. Ganî Hukmatê Başûrî bi cipersayîşanê hemverê şarî nê, bi cagirewtişê kîşta şarî hemverê şerî de vindero.”