Endama Koordînasyonê Komalanê Cinîyan ê Kurdîstanî (KJK) Zerîne Rûken ANFyî reyde qisey kerd.

Qiseykerdişê Zerîne Rûken ra beşêk wina yo:
''Menga gulane menga şehîdan a. Ez pêro şehîdan bi rêzdarî û mînetî yad kena. Şehîdî fîrazîyê ma yê. Ma do nê hêrişanê vera goranê şehîdan ke vera îradeyê ma zî yeno kerdene pê têkoşînê xo yê cinîyan werte ra wedarê. 

Dewleta tirke pêro erjanê merdimîye binpay kena. Dewleta ke vera ma de ya, dewletêka zorbaz a ke tede exlaq û wijdan çin ê. Bi taybetî têkoşînê Têgêrayîşê Azadîye yê Kurdîstanî ra dimavera şarê kurdî polîtîkayê qirkeridşî ameyî caardene. Her ke îradeyê cinîyan û şarî xurtêr beno sîstemo qirker ê vera têkoşînî xorinêr beno.

Kolonyalîstî pê şîdet, teda, tepiştiş, îstîsmarê doman û cinîyan, îşkence û operasyonanê qirkerdişê sîyasîyî xîret kenê ke merdimî koç bikerê û bi nê hawayî demografîya Kurdîstanî bivurnê. Nê xîret kenê ke erjanê komelî çin bikerê. Asta cinîyan ê kurdan hetê her kesî ra dîyena. Her parçeyê Kurdîstanî de hîşmendîyêka pîle awan bîye û cinîyê kurdî rayberîya şorişî kenê. Cinîyî seba ke tecrîdê vera Rayber Apoyî biqedînê têkoşînêkê xurtî anê ca. Hêrişê ke yenê kerdene tecrîd û îzolasyonî ra cîya nîyê.

Seba ke Rayber Apo û tepişteyê sîyasîyî bêrê veradayene ganî her hetî ra têkoşîn bêro pîlkerdene. Heta ke Rayber Apo azad nêbo ma nêeşkenê qala serkewtişî bikerê. Zîndanan de tepişteyê nêweşî şehîd benê. 

Dewleta tirke nika zî hêrişê têkoşînê cinîyan kena. Komel senî eşkeno vera nê hêrişan bêveng bimano û nînan qebul bikero? Dewleta tirke seba ke nêeşkena hetê fîzîkî ra têkoşînê şarê kurdî çin bikera bi hawayêkê gemarinî pê metodanê tarîyan wazena şarê kurdî bêwijadan û eqlaq bikera. 

Hêrişê vera goristanan û hêrişê Rojawan, Efrîn, Serêkanîyê, Girê Sipî pêro sûcê merdimîye yê. Pê nê hêrişan ê zî qebul kenê ke faşîst ê. Kurdan qet vera nê hêrişan sereyê xo nêard war. DAÎŞ zî sey nînan bi. Çimeyê cerganê Rojhelatê Mîyanênî TC yo.

Cinîyan ê kurdan, şarê kurdî û dostanê ci her ca de xo rêxistin kerd û payan ser ê. Paradîgmaya neteweyê demokratîkî seba şaran pêroyînan çimeyêko pîl ê cuya azade û xeta azadîye ya. Yewîya neteweyî ya kurdan a seserra 21. do bikera ke kurdî bibê wayîrê statuyêkî. Coka ganî kurdî yewîya neteweyîye pê bernameyêkê stratejîkî bercnê û bîyarê ca.

Dewleta tirke sey dizan şewe dekewena goran, esteyê cenazayan diznena û çin kena. Ganî rijîyayîşê cenazayan hol bêro famkerdene. Ê xîret kenê ke  fîrazî û vîrê komelê kurdî bidiznê. Şehîdî vîrê komelê kurdî yê. Wazenê nê vîrî werte ra wedarê û îradeyê kurdan ê azadan bikişê. Nêbo çira wazenê mergan reyna bikişê? Ê wazenê komel û tewir, wijdan exlaqê komelî bikişê.

Cinîyî do pê rexistinbîyayîş û paştdayîşê xo yê hemparî do nasnameyê faşîstî yê dewleta tirke çin bikerê û do ser bikewê.''