Parlamentera verêne ya HDP’yî ya Colemêrgî û hemsereka verêne ya KCD’yî ya esîre Selma Irmake, roja 15ine ya grevê vêşanîye yê bêdem û bêagêrayîşî de mesajêk şirawit û vat, ma sereberz û biheyecan ê ke ma bi mesuldarîya umîdî hemverê bêumîdîye de hurzenê.

Selma Irmake ANF’yî rê mesaj şirawit û ard ziwan ke tecrîdkerdişê Ocalanî însanî û exlaqî nêyo û ganî cewabê waştişê cimatkîyî bêro dayene, şert û mercê azadî seba cuye û xebata Ocalanî bêrê afernayene. Irmake nêrazîbîyayîş ramot ke bi pêvînayîşê reyêk yê keyeyî cimat yeno manîpulekerdene û vat, sebrê şarê Kurdî dir yeno kaykerdene.

YENO MANAYA RENCÎDEKERDIŞÎ

Irmaka ke 16‘ê Çile de bi hemsereka DBP’yî Sebahat Tuncele dest bi grevê vêşanîye yê bêdem-bêagêrayîşî kerdo, dewamê mesajê xo de vat, “Hukmat û Wezaretê Edaletî herinda ke cewab bidê waştişê seba wedartişê tecrîdî, kenê ke çalakîya grevê vêşanîye bin fînê, manîpule bikerê û cimatî hem hîna zaf sûr bikerê, hem zî rencîde bikerê.” 

TARÎYÎYA SÎYAYE DE ROŞNAYÎ

Vervatoxa KCD’yî û parlamentera ma ya Colemêrgî Leyla Guvene 8’ê Teşrîna peyêne de seba qedînayîşê tecrîdkerdişê Birêz Ocalanî dest bi çalakîya grevê vêşanîye kerd. Bi zerrîya xo ya cinî ez çalakîya ci silam kena. Heman wextî de ez serberz û biheyecan a, çunke ez bi serkêşîya cinîyan na mesuldarîye gêna xo mil ke tarîyîya sîyaye de benê roşnayî, mîyanê bêumîdîye de benê umîd. Bi nê hîs û bawerîyan ez sere de Leyla Guvena ke bi meşaleyê destê xo tarîyîye raste ra wedarena û daya vernî, cinîyê xoverdayoxan, çalakwananê Strasbourgî, yê Hewlêrî, Amed ra heta Kandira heme çalakwanan û şarê ma yê erjayeyî bi hurmet, umîd û xoverdayîşî silam kena.  

ÎMRALI SÎSTEMÊ TESLÎMGIREWTIŞÎ YO

Hemeyê dinya, dost-dişmen rind zano ke Birêz Abdullah Ocalan şexsêko tena nêyo; şar o, şarê neteweya demokratîke yo, o her kesê ke rastîye gêrenê, edalet, aşitî, heqanê merdiman û azadîye ra bawer kenê yo. Sîstemê tecrîdî yê Îmraliyî ke 20 serrî yo bi hawayêkê nîzamîyî dewam keno, sîstemêkê teslîmgirewtişî yo ke çaxê nikayênî û ameyoxê cimatî ser o zextan keno û keno ke çok bi ci bido ronayene. La netîce nêgirewto, do nêeşko bigîro.

MA QERARDAR Ê

Seba ke tavilî cewabê waştişê çalakwanan bêro dayene ma dest bi çalakîyêka winayêne kerde. Pêvînayîşo kilm ê Birêz Ocalanî bi birayê xo dir pozîtîf o, labelê qîm nêkeno. Babeta wedartişê tecrîdî de ma biisrar ê û qerardar ê.

MA VENG DANÊ HER KESÎ

Ez her kesê ke heta nika şexsê Leyla Guvene de paştî daya nê waştişî silam kena. Labelê seba şiknayîşê tecrîdî lazimî bi mesuldarî û organîzebîyayîşêkê pîlêrî esta. Ma veng danê her kesî ke bi hawayêkê netîcegirewtoxî tewrê prosesî bibê.