Wendekara Zanîngehê Munzurî Gulîstane Doku 5ê çeleyî ra nata Dêrsim de vînbîyaye ya û tira xeberêke nêna girewtene. Xebatê cigêrayîşê Gulîstane Doku yê ke binê awe de ameyêne kerdene bi talîmatê Wezîrîya Karanê Zereyî  6ê temmuze de ameybî vindarnayene.

Keyeyê Gulîstane Doku 16ê temmuze de semedê pêrsayîşê aqibetê kênaya xo şi Anqara û  Wezîrê Karanê Zereyî yê Tirkîya Suleyman Soyluyî de pêvînayîş kerd. Waya Gulîstane Doku, Aygule Doku ya ke derheqê pêvînayîşî de zanayîş da vat semedê cigêrayîşê waya aye do Aawbendê Uzun Çayirî bêro vengkerdene. Aygule Doku ard ziwan ke înan Soyluyî ra vato ke ê şikdarê ke kênaya înan ameya kiştene û vat înan ra ameyo vatene ke semedê şikdar Zeinal Abarakov qedexeyê vejîyayîşê teberê welatî esto û do îhtîmalê cînayetî ser o bêro vindetene.