Endamanê Meclîsê Cinîyan ê Komeleya Elewîyanê Demokratîkan ê Dêrsimî (DAD) bi wesîleyê serrgêra  4ê Gulane Terteleyê Dêrsimî eşkerayîyêke daye.

Eşkerayîye de nê ameyî parekerdene: ''Îşligo gonîn dîya Dêrsimî ra û mekanê Derwîşan seba ke heme komel rê nîmune bo  ameyêne cezakerdene. Heyetê wezîran tarîxêk aferna ke ma çirey tira nêvejîyayî. Mendeyan şîyayeyî, herre hawayî, daran milçîkî qet canêverdayî. Zeman biherikîyo zî mekanî wayîrê xo xo vîrî ra nêkerdî. Înan ke ê rojî ciwîyayî tira vanê Tertele. Yew erdlerz bi ke her çî ser û bin kerd.

Ma serrgêra 83ine de êyê ke bi deyîranê xo zalîman rê da vînîkerdene ma înan yad kenê. Ma  cinî, doman û heme gananê xo yê ke Tertele de vînî kerdî bi hurmet yad kenê. Her înkar yew goro komkerde yo. Ganî Terteleyê Dêrsimî sey fermî bêro naskerdene ke wa hînî çew rîyê ziwan û bawerîya xo ra mero qetilkerdene. Ma veng danê ke wa  xozaya ma ya ke bawerîya ma her nuqtaya ci de yena ciwîyayene bêro wayîrvejîyayene.

Ma senî ke kênayê xo yê vînkerdeyî xo vîra nêkerdî ma do Gulîstane Doku zî xo vîrî ra mêkere û heta vînayîşê Gulîstane ma peyê naya cameverdê. Rîyê janê Korona ra çi heyf ke ma emser nêeşkenê pîya vîrardiş virazê. Coka ma veng danê heme cinîyan ke wa 4ê gulane saete 19:38î de çirayanê xo tafîne û bi #ÇerağlarımızHiçSönmeyecek, #HerİnkarBirTopluMezar, #AleviKadınlar medyaya sosyale de pare bikerê.''