Sîse Bîngola 85 serrî ya ke Zîndanê Tîpê Tyî yê Tarsûsî de manena xeylî nêweşîyê aye estî û rixmê naye nîna tehlîyekerdene. Temsîlkara Herêma Çukurova ya ÎHDyî Yasemîn Dora Şekere da zanayene ke nameyê domananê Sîse Bîngole zî nîno aye vîrî.
Goreyê daneyanê Komela Heqê Merdiman (ÎHD) hezar û 154 hepsîyê nêweşî zîndanan de estî û nînan ra rewşa 402 hepsîyan giran a. Nînan ra yewe zî Sîse Bîngola 85 serrî ya. Bîngole Zîndanê Tîpê Tyî yê Tarsûsî de manena û nêweşîyê mîde, şekir, astim, tansîyon û sewbîna aye de estî. Bîngola ke tena sereyê xo nêşêna bicuya, bi hetkarîya hepsîyanê bînan cuya xo domnena.
Temsîlkara Herêma Çukurova ya ÎHDyî Yasemîn Dora Şekere mîyanê aşme de Bîngole reyde pêvînayîş viraşt û problemê aye goşdarî kerdî. Şekere va ‘herçiqas ke Bîngole 85 serrî ya zî 2 serrî yo zîndan de ya’ û wina domnaye: “Bîngole emrê xo ver êdî hewceyê aye yê ewnîyayîşî esto û ganî bêro tehlîyekerdene.”
Şekere dewamê qiseykerdişê xo de wina va: “Bîngole zaf extîyar a û nameyê laj û kênaya aye zî nêameyêne vîrê aye. Wexto ke mi nameyê kênaya aye pers kerd, aye nameyê dewa xo va. Seba ke goşê aye giran bîyî, tena qisey kena. Cok ra demêk ra pey hetê hilmgirewtişî de zehmetîye ancena û awe şimena. Wexto ke kewena zorîye, na rey bermena. Zîndan de mendişê aye wijdanê merdimî dejneno. Bîngole seba ke hepsîya sîyasî ya, nîna tehlîyekerdene.”
