Têgêrayîşê Azadîye yê Cinîyan ê Êzidîyan (TAJÊ) derheqê cinîyan ê ke waranê kontrolî de hetê PDKyî ra yenê remnayene de eşkerayîye daye.

Eşkerayîye de ame vatene ke êzidîyê ke badê Fermanê 3ê Tebaxa 2014î kampanya Başûrê Kurdîstanî de ameyî cakerdene, hetê PDKyî ra sey esîran yenê tepiştene.

TAJÊ bale ante ser ke PDK vera cinîyan ê êzidîyan sîyasetêkê leyminî rayra beno û vat pê nê sîyasetî kenê ke cinîyan ê êzidîyan kultur, bawerî û ehleqê înan ra dûrî bifînê.

Eşkerayîye de ame îfadekerdene ke serranê peyênan de hetê hêzanê PDKyî ra bi desan cinîyê êzidî ameyî remnayene û ame vatene: ''Hema zî aqibetê nê cinîyan nîno zanayene. Tewr peynî de kampê ke binê kontrolê PDKyî de yê, nînan ra di cinîyê êzidîyî ameyî remnayene. Sey nînan bi desan vakayê remnayîşî est ê la keyeyî zextê PDKyî ra vengê xo nêvejenê.''

TAJÊ vat ganî şarê êzidî agêro erdê xo ke verê nê remnayîşan bêro girewtene.