Goreyê îstatîstîkan Tirkîya de wextê janî de şîdetê vera cinîyan se ra 30 zêdîya. Wekîla HDPyî ya Agirî Dîlane Dîrayet Taşdemîr pare kerd ke şîdetê vera cinîyan, qirkerdişê cinîyan polîtîkayanê îqtîdarî ra cîya nîyê. 

Dîlane Dîrayet Taşdemîr vat: ''Îqtîdar destkewteyanê cinîyan keno hedef û wazeno ke cinîyan bêpawtiş verado. Prosesê janî de muracatê seba keyeyanê cinîyan mekanîzmayanê hêzanê asayîşî de zehmet bîyî. Seba ke cinîyî nêeşkê nê mekanîzmayan bixebitnê destê înan ra çi ame kerd. Cinîyî bêalternatîf, bêçare û bêpawtiş ameyî veradayene. Pê bahaneya janî cinîyî keye de ameyî veradayene û înan rê şîdet ame kerdene. Kişîyayîşê cinîyan sey xokiştiş ame mojnayene.  Tewr peyêne Agirî, Mêrdîn û Amed de cinîyî bi hawayêkê şikdarî merdî. Nê cinîyan rê keyeyê ci de şîdet ameyêne kerdene. Labelê no nêame cigêrayene. AKP pê tewirê xo zemînê serebûtan aferneno.

Taşdemîre îfade kerd ke îqtîdar wazeno rejîmêkê neweyî awan bikero û nê rejîmî de zî cinîyî têna zereyê keyeyî de yenê cakerdene. Taşdemîre vat: ''Cinîyê ke nê nêzdîbîyayîşê îdeolojîkî qebul nêkenê, vera faşîzmî têkoşîn kenê benê hedef. Cinîyê kurdî bi hawayêkê giranî benê hedef. Têna Kurdîstan de nê, Paris de 3 cinîyî ameyî qetilkerdene, Kobanê de 3 cinîyê aktîvîstî ameyî qetilkerdene. Cinîyî nê prosesî de pê rolê rayberîye têgêrenê. Beno ke no înan qerqilneno.

Rojhelatê Mîyanênî de komê radîkalî kenê ke têkoşînê cinîyan wa wedarîyo, hetê îdeolojîkî ra awankerdişê bazaranê kolekerdişê cinîyan, têkoşînê cinîyan werte ra wedarîyo. AKP zî versîyonêkê ney keno. Aktîvîstî yenê tepiştene, hemserekîye rê gef yeno wendene. Coka têkoşînê cinîyan hem ninê tehlukeyî de yo hem zî mîyanê xoverdayîşî de yo.''