Nê wextan de hêrişê AKPyî yê vera cinîyan ê kurdan zêdîyayî. Tewr peyên vizêr Vervatoxa Têgêrayîşê Cinîyan ê Azadan (TJA) Ayşe Gokkan û Vervatoxa Platformê Rojnamegeran ê Cinîyan ê Mezopotamya û edîtora Jinnewsî Ayşe Guney zî tede xeylêk sîyasetmedarê cinîyî û temsîlkarê rêxistinanê komelê sivîlî ameyî destbendkerdene.

Derheqê hêrişanê îqtîdarê AKPyî yê vera cinîyan ê kurdan de Wekîla HDPyî Dîlane Dîrayet Taşdemîr qisey kerd û îfade kerd ke AKP cinîyan ra terseno. Taşdemîre operasyonê vizêrînî vistî vîrî û vat seba ke têkoşînê cinîyan bêro binkerdene cinîyê kurdî sey laboratuwarêkî yenê xebitnayene û her ca de benê hedef.

Taşdemîre ard ziwan ke warê cinîyan warêko pir xoverdayox o û 5 serrî yo ke wextanê tewr tarîyan de zî cinîyî vejîyayî kuçeyan, îtîrazê xo kerdî, meydanî kerdî azad, warêko pîl awan kerd. Taşdemîre vat: ''AKP zî naye ra terseno. Maya Haştîye Hayrîye Demîra 70 serre ameye destbendkerdene. Seba înan serre, pozîyon, nêweşî ferq nêkenê. Eke ti kurd be, muxalîf be hînî benî hedef. Seba ke îqtîdarê xo dewam bikerê ê rojnameger, baro, medyaya komelkîye, aktîvîst kenê hedef. Ewro sîyaseto ke yeno kerdene sîyasetê çinkerdişî yo.''

Taşdemîre peynî de vat ke rixmê pêro hêriş û tedayan zî têkoşînê cinîyan bêmabên do dewam bikero.