Yewîya Starî mîyanê 12 serran de perwerdeyî ra heta edaletî, ekonomî ra heta bi kooperatîfan herême de morê xo da binê xeylêk karanê serkewteyan.

Vervatoxa Kongreya Starî Remzîya Mihemed û Endama Dayîreyê Têkilîyanê Teberî yê Meclîsê Pêroyî yê PYDyî Arîfe Bekîr qala na rêxistinîya 12 serran ANFyî rê kerde.

Remzîye Mihemed ard ziwan ke mîyanê zehmetîyanê giranan û tedaya rejîmê Baasî de înan bi hawayêkê nimitkî karê xo yê rêxistinîya cinîyan kerdêne û vat: ''Ma kongreya xo ya 3. Efrîn de kerde û mojna her kesî ke ma eşkenê rêxistinîya cinîyan bîyarê ca. Mîyanê Şorişê Rojawanî de ma estbîyayîşê cinîyan awan kerd. Xora hêriş û komployê vera ma zî zêdîyayî. Rejîmê Baasî waşt ke îradeyê ma bişikno. La cinîyê kurdî bi xurtî tewrê pêro meclîs û komîteyan bîyî. Ma bi hezaran şehîdî dayî.

Wexto ke DAÎŞî hêrişê şaristananê ma kerd zî cinîyan xo rêxistin kerd û cewab da nê hêrişan. Cinîyan pêro beşanê herême ra îstîfade kerd û rêxistinîya xo ya xosere awan kerde. Bi sîstemê hemserekîye zî ma herême de rolêko pîl ard ca. Cinîyan dî ke wexto ke xo perwerde û rêxistin kenê eşkenê heqê pêro hêriş û barbarîye ra bêrê.''

Arîfe Bekîr zî dîyar kerd e înan bi bira cinîya azade, komelê azadî û têdûştîye karê pîlî kerdê û vat: ''Ma kongreya diyîne de bire daye ke wa pêro cinîyê herême tewrê xebatan bibê û rêxistin bibê. Ma bire daye ke se beno wa bibo ma ganî seba azadîye têkoşîn bikerê. Serê azadîya cinîyan û komelî de ma xeylêk birî girewtî. Ma 2009 de Kefer Sixîr de kongreya 3. kerde û birê girîngî dayî. O çax yew dezgehê ma çin bi. Ma keyeyan de xebatê xo kerdêne. Wexto ke ma keyeyan de ameyêne pêser zî bi nimitkî xebitîyayêne. Prosesêko zaf zehmet bi. Seba ke  karê rêxistinîye yê keyeyan ameyî kerdene nika her warê şorişî de bi desan dezgehê cinîyan est ê.''