Hemsereka Pêroyî ya HDPyî Pervîne Buldan merkezê pêroyî yê HDPyî de qiseykerdişê destpêkî yê Kombîyayîşê Meclîsê Cinîyan kerd.

Qiseykerdişê Buldane ra tay çîyî wina yê:

"Hewteyê vîyarteyî serrgêra qedexeyê vejîyayîşê teberî bîye. Ê wextî de 108ê ci domanî, 107î cinîyî 2 hezar 500 kesî ameyî qetilkerdene. Ez nê kesan pêroyînan bi rêzdarî yad kena.

Ganî baş bêro zanayene ke heta ke têkoşînê cinîyan dewam biko wayîrêkê zulmî do bêceza nêmano. Rayîrê ma derg, têkoşînê ma pîl û biîdîa yo. Bi taybetî vera cinîyan teda, şîdet, qrikerdişî dewam kenê. Dewrê îqtîdarê AKPyî de şîdetê vera cinîyan tewr safî nêbi.

No îqtîdar bi xespkerdişê şaredarîyanê ma heqê weçînayîş û weçinitîşê cinîyan binpay keno. Ma vînenê ke bi derbekerdişê sîstemê hemserekîye vera cinîyan şîdeto sîyasî yeno kerdene. Keyeyê hemşaredaranê ma yenê sereştene, berê înan bi balyozan yenê şiknayene û sereyê hemşaredaranê ma yê cinîyan rê çeke yena antene. Mîsalê nê yo peyên Hemşaredara ma ya Sûrî Fîlîze Buluttekîn a. Hemşaredarê ma bi nê hewayî yenê tepiştene.

Ê çend eşkenê wa vajê ke krîz çino. Tewr baş cinîyî zanenê ke krîzêko pîl esto. Tewr zaf cinîyî butçeyê têdûştî ra, bêkarîye ra ancenê. Cinîyê ke binê pawitişê dewlete de zî yenê kiştene, her beşê cuye de bêdûştîye ancenê zanenê ke dewlete zûr kena.

Ez wazena vaja ke ganî cade polîtîkayê 'asayîşî' bêrê vindertene. Hukmatê AKPyî yo ke seba prosesê çareserîye wedarite wasifanê xo dano ganî hol bizano ke seba ke prosesê çareserîye qedîya tewr zaf cinîyan dej ant. Meseleyê tewr girîngî yê Tirkîya mesela kurdan û mesela tecrîdî yê. Birêz Ocalanî serranê 2011-2015î de mesele bê pêkewtişan çare kerdibi. La no xîret ame zîyankerdene û Tirkîya bi nê hawayî bin kewte.

Heqîbeyê ma de ecizîye û teslîmîyewt çin ê, heqîbeyê ma têkoşîn esto, xoverdayîş esto."