Emîne Şenyaşara ke mêrde û di lajê ci hetê pawitox û merdimanê Wekîlê AKPyî Halîl Îbrahîm Yildizî ra kişîyayî lajê xo Ferît Şenyaşarî reyde verê Edlîyeyê Riha de 16 rojî yo çalakîya 'nobeta edaletî' rê dewam kena. Keyeyê Şenyaşar ewro zî pê dowîzanê bi nuşteyê 'Ma edalet wazenê', 'Seba domananê mi edalet', 'Ez seba mêrde û domananê xo edalet wazena' verê edlîyeyî de ronişenê.

Têgêrayîşê Cinîyan ê Azadan (TJA) rixmê varanê xurtî zî keyeyê Şenyaşarî zîyaret kerd. Aktîvîstê TJA, Wekîla HDPyî ya Amedî Remzîye Tosun, Hemsereka Partîya Herêman ê Demokratîkan (DBP) ya Riha Sevvale Gulmez zî ekîpa zîyaretî de bîyî.

Dayîke Emîne zîyaret de vat: ''Ez her ca ra gêraya edaletî la mi nêdî. Ez do tuwerzîn bigêra xo destî, betonan birijna û bigêra edaletî. Beno ke edalet uca de yo.''

Remzîye Tosun zî ard ziwan ê hetê têkoşînê keyeyî de yê û vat: ''Dejê dayîke Emîne dejê ma yo. Senî ke 3 serrî verî 3 kesî bi hawayêkê bêedaletî ameyî qetilkerdene ewro zî Fadil Şenyaşar bi hawayêkê bêedaletî tepişîyeno.''

Hetê bînî endamanê Tum Bel Senî yê Riha zî keyeyê Şenyaşarî zîyaret kerd û mesajê paştdayîşî da ci.