Têgêrayîşê Cinîyan ê Azadan (TJA) deklarasyonê xo yê 8ê Adare Roja Cinîyan ê Kedkaran a Dinya vizêr Komeleya Huner û Kulturî ya Dicle de eşkera kerd. Xeylêk aktîvîstê TJA, Komeleya Cinîyan a Rosa,  Hemsereka Pêroyî ya DBPyî Salîha Aydenîz, wekîlê HDPyî Ebru Gunay, Meral Daniş Beştaş, Remzîye Tosun, Gulîstane Kiliç Koçyigit û Dîlane Dîrayet Taşdemîr û Hemsereka Pêroyî ya HDPyî ya Amedî Gulîstane Atasoy û îdarekarê partîye tewrê eşkerayîye bîyî.

Deklarasyon hetê aktîvîsta TJA Gulîstane Sonuk ra ame eşkerakerdene. Sonuk vat: ''Ewro her cayê dinya de vengê “Jin, Jiyan, Azadî” beno berz, ma do sey TJA nê vengî berzêr bikerê. Ma têkoşînê 129 cinîyan ê ke New York de ameyî qetilkedene ra, Rosa Luxemburg ra heta Clara Zetkin, Leyla Qasiman ra heta Sara û Sevêyan, Aysele Doganan ra heta Nagihan Akerselan, Jîna Emînî ra heta Evîne Goyîyan têkoşînê azadîye yê heme cinîyan ê vera dewlete-camerdî silam kenê.''

Sonuke bale ante erdlerzê Mereşî ser û vat: ''Ma reyna dî ke problemê komelkîyî rîyê sîstemê dewlete-camerdî ra qewimîyenê. Beno ke verê erdlerzî nêro girewtene la rijnayîşê wina giranî rîyê îxmalê dewlete ra, nêgirewtişê tedbîran ra bîyî. Seba ke îqtîdar serê rant û talanî ameyo ronayene, berpirsîyarê nê taxrîbatan o. Badê erdlerzî Kurdîstan ra heta Tirkîya û Ewropa cinîyan, ciwanan û şaran paştîdayîşo komelkî mûnt. Îqtîdarê ke herêma erdlerzî açarna qirkerdişê komkî kerd ke pê îlankerdiş Halê Îstîsnayî nê paştîdayîşî bişikno. Nê zî qîm nêkerd merkezê paştîdayîşî de qeyûm ca kerd û reyna îradeyê ma xesp kerd.''

Sonuke polîtîkayê şerê taybetî vist vîrî û vat: ''Sîstemê camerdê serdestî vera cinîyan polîtîkayanê leyminan rayra beno. Bi polîtîkayanê şerê taybetî kenê ke cinîyan bikerê bêîrade, bêpawitiş biverdê. Bi ajankerdiş, kundox, fuhuşî kenê ke komelî hetê ehleqî ra birijnê. Ma vera polîtîkayanê şerê taybetî reyna vanê ke; şexdê Îpeke Er, Firdevs Babat, Gulîstne Doku de, vera şîdetê plankerdeyî yê sîstematîkî yê uniformayinî yê vera cinîyan ê kurdan ê ciwanan; cinîyî do bi ayebîyayîş û rêxistinbîyayîşî sîstemê camerdê serdestî yê faşîstî yê tecawuzkarî bin bifînê.''

Gulîstane Sonuk wina dewam kerd: ''Ziwanê ma yê dayîke ra heta kulturê ma nasnameyê ma yê cinîyan ê kurdan hetê dewlete ra sey çîn hesibyeno û asîmîle beno. Ma vera na polîtîkaya qirkere do dahîna zaf wayîrê ziwan û kulturê xo bivejîyê. Ma sey TJA reyna vanê ke sere de meseleya kurdan muxatabê heme problemanê komelkîyan Îmrali yo. Ma azadîya fîzîkîye ya Rayberê Şarê Kurdî Abdullah Ocalanî genê merkezê xeta têkoşînê xo. Modelê hemserekîye yo ke  hetê cinîyan ê kurdan ra  game bi game ame mûntene û sîyaseto demokratîk o ke azadîya cinîyan esas geno do nê îqtîdarî biqedîno.  Cinîyî do pêro pîya vera nê îqtîdarê ke binê erdlerzê Mereşî de mend, serkewtişê girdî yê neweyî înşa bikerê.''

Çalakî û aktîvîteyî

Sonuke çalakî û aktîvîteyê ke semedê 8ê Adare hazir kerdî wina rêz kerdî:

''Startê çalakîyan do 1ê adare de Şirnex de bêro dayene.

Mabênê 1-8ê adare de cinîyê ke heme herêman de binê tesîrê erdlerzî de mendî,  ma do cayê înan de mîyanê paştîdayîşî de bê.

8ê Adare de Êlih, Sêrt, Şirnex, Wan û Mêrdîn de rayraşîyayîş û eşkerayî û heme bajaranê bînan de pîya platformanê cinîyan do eşkerayîye û rayraşîyayîş hemparî bêrê kerdene.

Metropolan de programê xoser û rayraşîyayîşî bêrê kerdene.

Ma sey TJA vera polîtîkayanê rijnayîşî yê nê îqtîdarê faşîstî, rêçê felsefeya Paştîdayîşê Cinîyan Dano Ciwîyayene, herêmanê erdlerzî de heme cinîyan reyde paştîdayîşê girdî bimanê, cuyeya newî pîya înşa biker û xoverdayîşî xurtêr bikerê.''