Têgêrayîşê Cinîyan ê Kurdan ê Ewropa bi eşkerayîyêke venga pêro kurdîstanîjan da ke tewrê rayraşîyayîşê Dusseldorfî yê 12ê teşrîna peyêne bibê û vat: ''Ganî her kes nê têkoşînê rûmetî de cabigêro.''

TJK-E da zanayene ke dewleta tirke pê çekanê kîmyewîyan gerîlayan qir kena û kena ke serrgêra 100. de Peymana Lozanî dibare bikera. TJK-E eşkerayîya xo de waşt ke wa dezgehê sey OPCW û Neteweyanê Yewbîyayeyan vera barbarî û hêrişanê kîmyewîyan ê dewleta tirke têbigêrê.

TJK-E vat: ''Ma pê bawer ê ke şarê kurdî û cinîyî pê mesuldarîya xo ya tarîxîye hayîdar bê. Ma venga cinîyan ê kurdan, meclîsanê cinîyan, înîsîyatîfan û şarê ma yê Ewropa danê ke bi ruhê seferberî têbigêrê û sûcanê dewleta tirke teşhîr bikerê. Nê esasî ser o ma 12ê teşrîna peyêne sey 'Ewropa de Roja Têkoşînê Neteweyî yê vera Çekanê Kîmyewîyan' îlan kerd. 12ê teşrîna peyêne de ganî şarê ma, cinîyî, ciwanî û dostê ma nêşorê dibistanan û karî, cuye vindarnê û tewrê çalakîye bibê; têkoşînê rûmetî de cabigêrê.''