TJK-E'yî komploya 15'ê Sibate şermezar kerde û vat, “Rayber Apoyî Girawa Îmraliyî kerda kelaya xoverdayîş, roşnayî û newe ra bîyayîşî.” TJK-E'yî vengdayîş bi her kesî kerd ke 16’ê Sibate de Strasboûrgî de bê û bibê vengê çalakwananê grevê vêşanîye.
Têgêrayîşê Cinîyan ê Kurdan ê Ewropa (TJK-E) bi eşkerayîyêka nuştekîye serrgêra 20’ine de hêzê komplogerî bi nefret şermezar kerdî û vat: “Têkoşînê ma yê Azadîye yê Kurdistanî yo ke morê xo dayo se serra 20’ine ro, 40 serrî ra zêde yo bi nameyê şarê Kurdistanî û Rojakewtena Mîyanêne û merdimîye, erjanê azadîye, demokrasî û têduştîye bi dayîşê bedelanê girdan paweno û xurt keno. Têkoşînê ma yo ke Kurdistan ra dest pêkerdo û cîhanî de vila bîyo, nuştişê destanê ci ewro hetê cinîyan û şaranê azadîperweran ra yeno domanyene.
Rayber Apo yo ke no xoverdayîş û têkoşîn o destankî afernayo, cuya xo daya têkoşînê mazlûman. Rayber Apo bi îdeolojîya xo ya azadîye û felsefeya xo heme polîtîkayê qilêrin ê modernîteya kapîtalîste vetî meydan. Dewleta Tirkîya ke vera na rastîye de kewta tengayîye, bi paştîdayîşî yê DYE, Rûsya û welatanê YE’yî komploya 15’ê Sibate kerde. Bi nê hewayî, 15’ê Sibate tena vera şexsêk de nêameya kerdene, şexsê Rayberêk şarî de, vera heme cinî û şaran ameya kerdene.
ÎMRALI BÎYO KELAYA XOVERDAYÎŞ Û NEWE RA BÎYAYÎŞÎ
Komploya 15’ê Sibate mabênê 20 serran de nêreşta amancê xo. Rayber Apoyî Girawa Îmraliyî kerda kelaya xoverdayîş, ronşnayî û newe ra bîyayîşî. 20 serrî yo ke binê tecrîd û xeztêko giran de yo la sîstemê xoverdayîş û ciwîyayîşî yê seserra 21’ine awan kerd. 4 serranê peyênan de vera Rayberîya ma tecrîdêko giran esto. Peyê nê tecrîdî de tena dewleta Tirkî nê, hêzê ke na kopmlo kerda estê. Hêzê komplokarî îradeyê sîyasî û cimatkî yê şarê Kurdî nas nêkenê. Tifaq û peymananê qilêrin ê ke bi rejîmo faşîst yê AKP-MHP’yî ameyo awankerdene, nê zelal ramojnenê.
MA PAŞTÎ BIDÊ XOVRDAYÎŞO KE TARÎXÎ NUSENO
Delîlo tewr konkret o ke, sazgehê sey Konseya Ewropa, Mehkemaya Heqanê Merdiman a Ewropa û CPT heta nika bêveng mendê. Çalakîya grevê vêşanîye yê bêdem-bêagêrayîşî ya Leyla Guvene ya ke semedê wedaritişê tecrîdê serê Rayber Apoyî yena domanye 15. Sibate de do roja xo ya 100. bikewo. Eynî wextî de Strasboûrgî heta Hewlêrî, Mexmûrî û Gallerî zaf cayanê dinya de grevê vêşanîye dewam kenê. Peyama ke xoverdayoxan daya ma zaf zelal a: Komploya 15’ê Sibate û tecrîd vera ma hemeyan o, seba naye zî ganî xoverdayîş bêro xurtkerdene.
Ma vengdayîşê heme şar, cinî û dostanê xo kenê ke 15’ê Sibate roja Îneyî ma tewrê çalakîyanê protesto yê verê konsolosxaneyanê dewleta Tirk û DYE’yî bibê. Reyna 16’ê Sibate de Strasboûrg de do rayraşîyayîşo gird bêro viraştene. Sere cinî û ciwanî ganî heme Kudî û dostê înan tewrê na çalakîye bibê û veng bidê vengê xoverayoxanê grevê vêşanîye.
