Têgêrayîşê Cinîyan ê Kurdan ê Ewropa (TJK-E) derheqê hêrişê dewleta tirke yê vera Kobanê de eşkerayîyêke weşanaye û pare kerd ke dewleta tirke ya îşxalkere pê destê hêzan ê mîyanneteweyîyan kurdan qir kena.

Eşkerayîye TJK-E wina ya:

''Hêrişê dewleta tirke ya îşxalkere yê vera dewa Helîncê ya Kobanê de Endama Koordînasyonê Kongreya Starî ya Herêma Firatî Zehra Berkel zî tede 3 embazê ma şehîd bîyî. Dewleta tirke ya faşîste seba ke Şorişê Cinîyan ê Rojawanî çin bikera pê pêro metodan hêrişê cinîyan kena.

Qirkerdişê Parisî de serra 2013î de Sakîne Cansiz, Fîdane Dogan û Leyla Şaylemez hetê îstîxbaratê tirkan ra, serra 2016î de zî Vakurê Kurdîstanî de Sêvê Demîr, Fatma Uyar û Pakîze Nayir hetê dewleta tirke ra ameyî qetilkerdene. Rojawan de zî Zehra û cinîyê têkoşerî bîyî hedefê dewleta tirke. Hêzê mîyanneteweyî yê ke warê hewayî nêgirewte, nê hêrişan ra mesuldar ê. Her keso ke vera nê hêrişan bêveng ê, hemparê nê hêrişan ê.

Rejîmo faşîst ê AKP-MHPyî dişmenê cinîyan o. Erdogan kiştoxê cinîyan o. Nê hêrişî hêrişê destpêkî nîyê. Vera nê hêrişan cinîyî do têkoşînê xo yê vera faşîzmî pîlêr bikerê, peynîya Erdoganî do bîyarê.

Ma venga kurdîstanijan, cinîyan ê kurdan, rêxistinanê cinîyan, demokrat, welatperwer û dostanê kurdan danê ke ewro saete 18:00 de bivejîyê teber. Têkoşînê cinîyan ê vera faşîzmî do ser bikewo.''