Têgêrayîşê Cinîyan ê Kurdan ê Ewropa (TJK-E) eşkerayîya nuştekî de dîyar kerd, çalakîya grevê vêşanîye ya bêdem û bêagêrayşî bi rayberîya hemsereka KCD’yî û parlamentera HDP’yî ya Colemêrge Leyla Guvene bi sloganê “Ma tecrîd bişiknîme, faşîzmî birijnîme û Rayber Apoyî azad bikerîme” yenê kerdene, bi biqerardarîya girde roja 84ine de ya.

Eşkerayîye de ame vatene, çalakîya Nasir Yagizî roja 71ine de ya. Xoverrodayîşê girewteyanê zîndanan roja 46ine de yo, xoverrodayîşê Strasboûrgî roja 45ine de yo.

Dewamê eşkerayîye de ame vatene, “Bi rayîrê çalakîya ‘xeleka merdimîye” ya cinîyan, vera bêvengîya dinyaye ma do bibê veng û biqerarîye waştişê azadî û xoverrodayîşî biqîrîme. Bi rayberîya çalakwananê ma yê grevê vêşanîye û bi xoverrodayîşê şarê ma, faşîzmê AKP-MHP’yî, komplokerdox û hêzê qirkerdoxî do vîndî bikerê.

Ma plan kerd ke 31ê Çile de Strasbourgî de verê Konseya Ewropa de çalakîya “xeleka merdimîye” bikerîme, la Walîtîya Strasboûrgî destûr nêda û hevalê ma ameyî girewtene û serde zî cezaya pereyan ameye dayene. Bi nameyê Têgêrayîşê Cinîyan ê Kurdan ma nê kerdişanê bikeyfî û antî-demokratîkan ê Walîtîya Strasboûrgî şermezar kenîme. Tu hêzêk nêeşkeno ma xoverrodayîş û têkoşîna azadîye ra bivisno.

Çalakîya ma ya ‘xeleka merdimîye’ kotî de ma do estê uca de dewam bikera. Seba çalakîya ‘xeleka merdimîye’ ya ke ma do her cayê Ewropa de bikerê, ma venga şarê xo danîme, bi taybet cinîyan û dosatanê xo, ke bi xurtî beşdarê çalakîye bibê.''