TJK-E: Pê xopawitişî cewab do bêro dayene hêrişanê Efrînî

TJK-E derheqê hêrişanê vera cinîyanê Efrînî de eşkerayîye daye û vat: ''Têgêrayîşê Azadîye yê Kurdîstanî sey her tim pê xopawitişî do cewab bido hîşmendîya tecawuzkere ya kolonyalîste.''

Têgêrayîşê Cinîyan ê Kurdan ê Ewropa (TJK-E) derheqê hêrişanê dewleta tirke û cerganê ci yê vera cinîyanê Efrînî de eşkerayîyêke weşanayene.

Eşkerayîye de wina ame vatene: ''Dewleta tirke qanûn, huqûq û krîterê mîyanneteweyî pêro bin pay kena û di serran ra zêdêr sere de Efrîn erdê Rojawanî de pê rayîrê cergan şerêkê gemarin kena. Dewleta tirke cerganê xo reyde vera demografîya Efrînî, tarîxê ci hêrişan kena. Nê hêrişî vera sîstenê konfederalî yê demokratîkî yê ke cinîyan rayberîya ci kerde.

Dewleta tirke îşxalê Efrînî ra nata ey DAÎŞî hêrişê cinîyan kena. Remnayîşê cinîyan, tecawuzê cinîyan û kişîyayîşê cinîyan bîyî sey karê rojane yê hêzanê kolonyalîstan.

Tewr peyên dîmenan de ke leşkeran medyaya komelkîye de pare kerdî de dîyeno ke leşkerî cinîyanê esîran rê kampan de pê zorî îşkence û tacîz kenê. Dewlete û dezgehê mîyanneteweyî vera nê barbarîye bêveng ê. Êyê ke bêveng manenê hende dewleta tirke sûcdar ê.

Têgêrayîşê Azadîye yê Kurdîstanî sey her wextî nika zî pê xopawitişî do cewab bido hîşmendîya tecawuzkere ya kolonyalîste. Ma zî nameyê cinîyan ê kurdan ser o na hîşmendîya tecawuzkere ya dewleta tirke û yê cerganê ci şermezar kenê û venga rayaumûmîya mîyanneteweyîye danê de sey berpirsîyar têbigêrê û vera zulm û kolonyalîzmê Efrînî tewirê xo bimojnê.''