Koordînasyonê TJK-F'yî derheqê hêrişê qirkerdişî yê  çeteyanê DAÎŞ'î  yê vera Şengalî de eşkerayîyêk daye û semedê tewrbîyayîşê çalakîyanê  3'ê Tebaxe veng da.

TJK-F'yî vist vîrî ke çeteyanê DAÎŞ’î  3’ê Tebax a 2014’î de hêrişê bajarê Şengalî yê Başûrê Kurdistanî kerd, bi hezaran doman, cinî û merdimê sivîlî qetil kerdî û bi hezaran cinîyê Êzidîyî hetê çeteyan ra ameyî remnayene û dereceya koleyanê cinsîyan de îşkence înan rê ame kerdene û ameyî kiştene û vat: '' Keyeyê bidejî a roje ra nata domanê înan ke çar leteyanê dinya ra vila bîyî, gêrênê înan, hema kenê ke derbanê xo bipêşî. Qirkerdişo ke verê heme dinya de ame kerdene ganî vera ci na bêvengîye bêro xeripnayene ke bi hezaran cinîyê ke destê çeteyan de yê bêrê xelisnayene.''

Koordînasyonî da pêhesnayene ke çarçeweya çalakîyan de 3’ê Tebaxe saete 11 de seba vîrardişê cinîyanê ke hetê çeteyanê DAÎŞ’î ra Şengal de ameyê qetilkerdene û ameyê remnayene aktîvîteya deqeyêk hurmetgirewtişî bêro kerdene û semedê tewrbîyayîşê çalakîyan veng da cinîyan.