'To Egîdêk da Kurdîstan ma do Kurdîstanêkê azadî bidê to'
Gerîlayanê cinîyan ê Rojhelatê Kurdîstanî pê mektubêk hîsê xo Halîse Îpek rê ke cenazaya lajê aye gerîlayê HPGyî Egîd Îpekî pê kargo ci rê erşawîyaye vatî.
Gerîlayê HPGyî Egîd Îpek serra 2017î de Dêrsim de şehîd bi û hîrê serran ra dima cenazaya ey pê kargo erşawîyaye keyeyê ci. Gerîlayanê cinîyan ê Rojhelatê Kurdîstanî pê mektubêk hîsê xo dadîya Egîd Îpekî Halîse Îpek rê ardî ziwam.
Mektubê gerîlayan wina yo:
''Dayîka cane aya ke embaz Egîd kerd Egîd ti ya. Aya ke embaz Egîd pê exlaqê azadîye kerdo pîl ti ya. To Egîdêk da Kurdîstan ma zî do Kurdîstanêkê azadî bidê to.
Ey dayîka Egîdan,
Ey dayîka ke qehremanî pîl kerdî
Dayîka Kurdîstanî,
Dayîka pêro gerîlayanê azadîye,
Ey embaza Rayber Apoyî
Dayîla can, şehadet seba ma mertebeyêka fîraz a. Şehadet raştîya PKKyî de raştîya tewr berze ya, erjo tewr fîraz o. Ma sey kurdan koleyî ardî asta azadîye, ê kerdî wayîrê rûmet û nasnameyî. Coka erjê ma yo tewr pîl Rayber Apo yo.
Şehîdî rayberê cuya ma ya azade yê. Ma pê berdewamî manewîyatê xo embazanê xo yê şehîdan rê gênê. Seba ke heyf û qesasê înan dişmenan ra bigêrê ma şer kenê û ciwîyenê. Şarê ma yo welatperwer, dadî û babîyê ma, pêro merdimê ma, şima seba cuyêka rûmetêne ercîyaye yê. Ma sey ewladê şima pê sond û peymane heta cuyêka azade û demokratîke awan bikerê deqayêk do nêvinderê.
Dayîka Cane wexto ke ma na xebere eşnawite ra nata dej û hesretê yo kewtî zerrîya pêro embazanê ma. Ma pêro bîyî Egîd, ma xo eştî verarê to û lew na to. Wexto ke ma dîmenê embaz Egîdî dî ma masûmîyetê meleketan zî tede dî. Ma hûyayîşê embaz Egîdî de germîya azadîye zî dîye.
Dayîka cane aya ke embaz Egîd kerd Egîd ti ya. Aya ke embaz Egîd pê exlaqê azadîye kerdo pîl ti ya. To Egîdêk da Kurdîstan ma zî do Kurdîstanêkê azadî bidê to.
Dayîka cane ma sey gerîlayanê Rojhelatê Kurdîstanî a hêle ra nata ke ma na xebere eşnawite sebirê ma nêno û heta ke heyf û qesasê embaz Egîdî nêgêrê sebrê ma do nêro! Ma do xeyalê embaz Egîdî bîyarê ca. Ma sond û peymane danê ke ma do Kurdîstanê azadî dîyarîya to û pêro dadîyanê şehîdan bikerê. Seba naye zî ma do heta hêla peyêne ya gonîya xo şer bikerê. Seba ke Rayber Apo azad bibo ma şer bikerê û ti Rayber Apoyî rê vaje ke 'No yo, mi Egîdêko winasên seba Kurdîstanî weye kerd.' ''
