Endama Konseya Rayberdişî ya Koma Cinîyan ê Kurdistanî (KJK) Pelşîn Tolhildane, mucadele û paradîgmaya cinîyan a ke hetê Rayberê Şarê Kurdî Abdullah Ocalanî ra ameya afernayene ANF’yî rê ercnayî.

Tolhildane vat, Rayberê Şarê Kurdî Abdullah Ocalanî dimayê awankerdişê Yewîya Cinîyan ê Kurdistanî (YJWK) yê serra 1987’î, projeyê artêşbîyayîşî, projeyê vurayîşî û vurnayîşê camêrdî û mucadeleyê hemverê zayendperestîye serra 1995’an de visto rojdemê xo. Tolhildane vat, “A game zêde hayîya ma ci ra çinbî. Na yewe do rengê cuye bivurnayêne. Zanayêne ke babetêka xeylî zehmete dir meşxul beno. Rayberîye tesîrê na yewe dî. Gama ke embazan ê cinî û camêrdan dir dîyalog viraştêne, na yewe ameyêne dîyene.”  

DÎNAMÎKÊ TÊGÊRAYÎŞÊ CINÎ AFERNAYÎ

Pelşîn Tolhildane vat, Ocalan rixmê heme hêrişan de zî nêverdayêne ke tesîr şorişê cinî ser o virazîyo û vat, “Kultur, ewnîyayîş, zihnîyet û karakterê mucadeleyê cinîyan afernayî. Halêkê îhtîmalê komplo de dînamîkê têgêrayîşê cinî vet meydan. Rixmê kemasî û hetanê ma yê peydemendeyan zî no çî berd sere.”

Tolhildane ard ziwan, embazanê înan ê cinîyan bi çalakîyanê fedayîyan dormeyê Rayberê Şarê Kurdî Abdullah Ocalanî de ameyî têhet û wina dewam kerd: “Çalakîya pile ya Sema veng daye. Rayberî 8’ê Adare de îdolojîya xilaskerdişê cinî eşkera kerde. Zekî zî o wext organîzasyonî ra visya û teslîm bi. Vateyê êyo vernî ke vatibi wina bi: ‘Eke şima wazenê Apoyî raste ra wedarê, PKK’yî û gerîlayî raste ra wedarê, hêrişê Botanî bikerê.’ Çalakîya embaze Sema çalakîya hemverê nê zextî û tasfîyekerdişê zîndanî bi. Berware, Rojbîne û Şehrîstane zî dormeyê Rayberîye de ameyî têhet û cewab da komploye. Na yewe ameyêne manaya temamkerdişê projeyê cinî yê Rayberî ke nîmcet mendebî. Cewabê cinîyan, gamê ke ameyêne eştene nîşaneyê wayîrvejîyayîşî bî.”

TEMAMKERDIŞÊ PROJEYO KE NÎMCET MENDIBI

Tolhildane vat, serra 1999’î ra nata ê kenê ke projeyo ke nîmcet mendo temam bikerê û wina dewam kerd: “Ma israr kerd ken ê projeyî bikerê male heme cinîyan ê dinyaye. Rayberîye şertanê Îmraliyî de zî perspektîfê xeylî muhîmî dayî ma. Nimûne; serranê 2000’an de karê muhîmî kerdî. Şert û halê têgêrayîşê ma xeylî zehmet bîyî. Rayberîye bi hawayêkê giranî ameyebî tecrîdkerdene. Serra 1999’î rah eta 2001’î heme notanê pêvînayîşan de hem hetê edebîyî ra hem zî hetê felsefeye ra seba cinîyan xebitîyayêne. Ewnîyayîşê ê yê roşinî û akerdeyî bîyêne sebeb ke ma pay ra vinderê. Temamkerdişê projeyê ê yê nîmcetî, bi pawitişê mucadeleyî, felsefe û îdeolojîya PKK’yî bena. Seba mucadeleyê azadîye yê cinîyan ke Rayberîye vatêne ‘projeyê min o ke nîmcet mendo,’ îhtîyacî bi gamanê sazîbîyayîşî, sîyasîyan û organîzekerdeyan esta. Nê heme zî seba Kurdistanêkê azadî, seba cuyêka azade yê.”

Tolhildane vat, Ocalan seba temamkerdişê projeyê nîmcetmendeyî verê herî çîyî weqfê cinîyan pêşnîyar kerdî û vat, “No proje serra 1999’î de pêşnîyar kerd û vat, ‘No proje xelata tewr pîl a ke serranê 2000’an de ez eşkena bidî cinîyan. No proje projeyêko universal o; cinîyê Kurdî, Tirkî, Erebî, ê ke şaranê bînan ray ê eşkenê mîyanê nê projeyî de bibê yew.’”

Pelşîn Tolhildane da zanayene ke Hollanda, Mexmûr û Rojava de weqfê cinîyan ê azadan abîyî û no bi tecrubeyêko xeylî muhîm.

Tolhildane bale ante serê gamanê bicaardişê projeyî û vat, “Peymana cimatkîye, ameyêne manaya peymana serê bingeyê peymeyanê cinîyan ê cimatî. Peymeyê na peymane û peymeyê artêşbîyayîş û partîbîyayîşê cinîyan hetê na xete ra yew bîyî. Peymana cimatkî dima ra bi jîneolojîye û projeyê hemciwîyayîşî ya azadî hîna aver şîye.” Tolhildane dewam de ard ziwan ke Rayberê Şarê Kurdî Abdullah Ocalanî wexto ke peymana cimatkîye pêşnîyar kerde vatêne, ‘Ez nê projeyî tena seba cinîyan ê Kurdan pêşnîyar nêkena. No yew projeyo universal o.’

ÇALAKÎYA LEYLA GUVENE BÎYE ZIWANÊ MA HEMEYAN

Pelşîn Tolhildane peynîya qiseykerdişê xo de bale ante xoverdayîşê hemverê tecrîdî ser û vat, “Çalakîya embaze Leyla Guvene bîye ziwanê ma hemeyan. ‘Biciwîye û bide ciwîyayene’ felsefeya ma ya bigeyêne ya cuye ya. Labelê gama ke cuye ciwîyayîşî ra vejîyaye, o wext PKK çirey xo dayîşê bedelan ê nê rayîrî ra xo dûrî nêdano. Ez sere de çalakîya Leyla Guvene çalakîya hemeyê xoverdayoxanê zîndanan silam kena.”