Şaristanê Toulouse yê Fransa de TJK-Fyî derheqê ''Şorişê Cinîyan ê Rojawanî de panelêk serûber kerd. Panelî de ke Înîsîyatîfê Cinîyan ê Toulouse serûber kerd Şorişê Cinîyan ê Rojawanî ke rayberîya cinîyan de ame ronayene roja yewîne ra heta ewro ame ercnayene.

Temsîlkara Karanê Teberî ya TJK-Fyî Hazale Karakuş sey qiseykerdoxe tewrê panelî bîye. Karakuşe derheqê şîdetê vera cinîyan de qisey kerd. Karakuşe vat: "Modernîteya sermeyedare û netew-dewlete xo camêrdîye û îqtîdarî ser o awan kenê."
Karakuşe vatişê ''Xelisîyayîşê merdiman têna bi azadîya cinîyan beno'' yê Rayberê Şarê Kurdî Abdullah Ocalanî vist vîrî û dewam kerd: ''Şorişê Rojawanî sey paradîgmaya awankerdişê Jineolojî ya ke îdeolojîyê xelisîyayîşê cinîyan a eşkera kerd."

Hazale Karakuş da zanayene ke Têgêrayîşê Azadîya Kurdan û têkoşînê ci kewtî serra 41. û pare kerd ke têkoşînê tarîxî yê 41 serre yê TAJî, rayberîya cinîyan de resa asta Şorişê Rojawanî. Karakuşe ard ziwan ke ganî cinîyî şarî reyde seba awankerdişê dinyayêke newîye rayberîye bikê û vat ke Şorişê Rojawanî Şorişê Cinîyan o.

Femînîstê Anarşîstî, Femînîstê Ekolojîstî, Rayraşîyayîşê Cîhanî yê Cinîyan, L’union Syndîcale Silîdaîre, Sud-Education ê ke derheqê xelisîyayîşê cinîyan de xebatê înan ê serkewteyî estê tewrê panelî bîyî.

Panel bi sloganê ''Cinîye, Cuye, Azadîye'' qedîya.